Saam Impact : नंदुरबारमधील 'त्या' कुंटणखान्यावर पोलिसांची धाड; अतिक्रमणवर नगरपालिकेचा हातोडा, साम टीव्हीच्या बातमीनंतर दणका

सागर निकवाडे 

नंदुरबार : नंदुरबार शहरातील शाळा, महाविद्यालयांच्या अवघ्या ३०० मीटर हद्दीत असलेल्या मुख्य रस्त्यांवर अवैधपणे देहविक्रीचा काळा धंदा सुरू होता. याबाबतची बातमी 'साम टीव्ही'ने प्रसारित केल्यानंतर नगरपालिका व पोलीस प्रशासनाला जग आली असून अवैधपणे चालविण्यात येत असलेल्या कुंटणखान्यावर पोलिसांनी धाड टाकत कारवाई केली आहे.

नंदुरबार शहरातील नामांकित असलेल्या मोठ्या शाळा, महाविद्यालयातील विद्यार्थी ज्या भागातून ये- जा करतात. याच भागातील रस्त्यावर अवैधपणे कुंटणखाना चालविण्यात येत होता. यामुळे अनेक रस्त्यावरून जाणाऱ्या महिला व विद्यार्थ्यांना याचा नाहक त्रास सहन करावा लागत होता. महाविद्यालयाकडे जाणाऱ्या रस्त्यांवर सुरू असलेल्या कुंटणखान्याबाबतची बातमी साम टीव्हीने काही दिवसापूर्वी प्रसारित केली होती. याची दखल घेण्यात आली. 

पोलिसांनी टाकली धाड 

महाविद्यालय, शाळा परिसरापासून काही अंतरावर कुंटणखाना चालविला जात होता. इतकेच नाही तर आजूबाजूच्या परिसरात भाजीपाला मार्केट व बसस्थानक देखील आहे. यामुळे या भागात नेहमीच वर्दळ असल्याचे पाहण्यास मिळत होते. मात्र नंदुरबार शहरात अवैधपणे चालविण्यात येत असलेल्या कुंटणखान्यावर आज पोलिसांनी धाड टाकत कारवाई केली आहे. यामुळे आता येथे चालत असलेले देहविक्रीचा व्यवसाय बंद पाडला आहे.  

अतिक्रमणावर चालविले जेसीबी 

नंदुरबार शहरातील महाविद्यालयाकडे जाणारा रस्त्यांवर अवैधरीत्या चालणाऱ्या कुंटणखान्यावर पोलिस प्रशासन व नंदुरबार नगरपालिका यांनी संयुक्त कारवाई केली आहे. बसस्थानक परिसरात चालणाऱ्या कुंटणखाण्याच्या अतिक्रमणावर नगरपालिकेने जेसीबी चालवीत येथे असलेले घरे जमीनदोस्त केले आहेत. आजच्या या कारवाईमुळे विद्यार्थी व महिलांना होणारा त्रास थांबणार आहे.