Nandurbar News : धनगर आरक्षणाला विरोध; नंदुरबारमध्ये आदिवासी समाज आक्रमक, सरकारविरोधात घोषणाबाजी

सागर निकवाडे 

नंदुरबार : आरक्षणाच्या मागणीसाठी धनगर समाजाने आंदोलन उभारले होते. धनगर समाजाला आरक्षण देण्यासंदर्भात सरकारने आदिवासींमध्ये धनगरांना आरक्षण देण्याचा जीआर काढण्यासंदर्भात निर्णय घेण्याचे सांगितले आहे. यानंतर नंदुरबार जिल्ह्यातील आदिवासी एकवटले असून धनगर समाजाला आदिवासींमध्ये आरक्षण देण्याच्या निर्णयाला विरोध केला आहे. 

धनगर समाजाने आरक्षणासाठी (Dhanagar Reservation) केलेल्या आंदोलनानंतर धनगर समाजाला आदिवासींमधून आरक्षण देण्यासंदर्भात आदेश काढण्याबाबत सरकारकडून करण्यात आलेल्या वक्तव्यानंतर नंदुरबारमध्ये समस्त आदिवासी समाज चांगलाच आक्रमक झाला आहे. (Nandurbar News) नंदुरबार जिल्ह्यातील अक्रानी तहसील कार्यालयासमोर एक दिवशीय धरणे आंदोलन करण्यात आलं असून सरकार मणिपूरसारखं जातीय तणाव निर्माण करण्याचा प्रयत्न महाराष्ट्रात करत असल्याचा आरोप आंदोलकांचा वतीने करण्यात आला.  

तर रस्त्यावर उतरून राज्यभर आंदोलनाचा इशारा 

या सोबतच धनगरांची घुसखोरी कदापिही सहन केली जाणार नसून आरक्षण वाचवण्यासाठी रस्त्यावर उतरून महाराष्ट्रभर निदर्शन करणार असल्याचा इशारा आदिवासी समाजाच्या वतीने देण्यात आलेला आहे. ठिय्या आंदोलनात उपस्थित असलेल्या सर्वपक्षीय नेत्यांच्यावतीने राज्य सरकारच्या विरोधात घोषणाबाजी केली.