मोफतचे धान्य नको..युवकाचे तहसीलदारांना निवेदन

नंदुरबार : जिल्ह्यातील शहादा तालुक्यातील खेडदिगर येथील युवक राजू सोमा शिंदे यांनी मला मोफतचे रेशन नको; असे निवेदन शहादा तहसीलदार डॉ. मिलिंद कुलकर्णी यांना देऊन प्रधानमंत्री जनकल्याण योजनेचा माझा पुरवठा थांबवावा अशी मागणी केली आहे. (nandurbar news No need for free food Young man statement to tehsildar)

खेडदीगर येथील राजू शिंदे यांनी दिलेल्‍या निवेदनात असे म्हटले आहे, की प्रधानमंत्री यांनी गरीब जनतेसाठी कोरोनाच्या (Corona) काळात प्रधानमंत्री जनकल्याण योजनेच्या माध्यमातून मोफत धान्य वितरण सुरू केले. ते आजपर्यंत सुरू आहे. याचा लाभ मी ही घेतला आहे. परंतु आता मी काम, कष्ट करून माझ्या परिवाराचा उदरनिर्वाह करू शकतो. या मोफतच्या (Nandurbar News) धान्याने मिळतेय म्हणून माझ्यातील आळस जागी होतोय. म्हणून मला या पुढे प्रधानमंत्री जनकल्याण योजनेचे मोफतचे धान्य नको.

शासन दराप्रमाणे खरेदीची तयारी

शासनाच्या रेशन दुकानामार्फत विकत वितरित करण्यात येणारे धान्य शासन दराप्रमाणे खरेदी करून घेईल. माझ्या या मोफतचे धान्य सोडल्याने कुणा गरीबास ते मिळु शकेल. एक सुजाण नागरिक म्हणून मोफत धान्य घेणे हे काही योग्य वाटत नाही. तरी माझ्या गरीब कल्याण योजनेचा कोटा थांबवावा अशा आशयाचे निवेदन शहादा तहसीलदार डॉ. मिलिंद कुलकर्णी याना देऊन मागणी केली आहे.