नवापूरमध्‍ये दोन हजार जणांना उपलब्ध होणार रोजगार; पाचशे कोटींची होतेय गुंतवणूक

नंदूरबार : जिल्ह्यातील नवापूर औद्योगिक परिसरात उद्योग उभारण्यासाठी पॉलीफिल्म प्रा. लि. कंपनीने पुढाकार घेतला असून सुमारे पाचशे कोटी रुपयांची गुंतवणूक करण्याची कंपनीने तयारी दर्शविली आहे. याद्वारे आदिवासी भागात सुमारे दोन हजार जणांना रोजगार उपलब्ध होणार आहेत. (nandurbar news Navapur will provide employment to two thousand people)

नवापूर (Navapur) औद्योगिक परिसरात येणाऱ्या कंपन्यांना या कंपनीला सर्व सुविधा उपलब्ध करून देण्याची तयारी महाराष्ट्र औद्योगिक महामंडळाने (MIDC) केली आहे. दरम्यान, लगतच्या सुरत (Surat) परिसरातील अनेक उद्योगांनी नवापूर येथे उद्योग विस्तार करण्यात स्वारस्य दाखविले आहे. याबाबत महाराष्ट्र औद्योगिक महामंडळ संचालकांच्या बैठकीत निर्णय झाल्याची माहिती उद्योग मंत्री सुभाष देसाई यांनी दिली आहे.

आदिवासी बांधवांना रोजगार

महाराष्ट्र आणि गुजरात (Gujrat) राज्याच्या सीमेवर असलेल्या नवापूर तालुक्यात औद्योगिक परिक्षेत्रात मोठे उद्योग आल्यास येथील आदिवासी बांधवांना रोजगाराच्या संधी उपलब्ध होतील. नंदुरबार (Nandurbar) जिल्ह्यात औद्योगिक परिक्षेत्रात कमी गुंतवणूकिमुळे रोजगाराच्या संधी कमी असल्याने येथील नागरिकांना रोजगारासाठी परराज्यात जावे लागते. परंतु, या नवीन उद्योगामुळे रोजगारासाठी बाहेर जावे लागणार नाही.