आजपासून दूधाची दहा रुपयांनी दरवाढ

नंदुरबार : पेट्रोल- डिझेलच्या दरवाढीमुळे जीवनावश्यक वस्तूंचे दर गगनाला भिडत असतानाच नंदुरबार जिल्ह्यात खुल्या (सुट्या) पद्धतीने दूध विक्रेत्यांनी लिटर मागे दहा रुपये दरवाढ करण्याचा निर्णय घेतला आहे. १ एप्रिलपासून दुध दरवाढीची अंमलबजावणीही सुरू झाली आहे. (nandurbar news Milk price hike by Rs 10 from today)

गत दोन वर्षात कोरोनामुळे (Corona) दूध दरवाढ झालेली नव्हती. गेल्या पाच वर्षातली मोठी दरवाढ आहे. दूध उत्पादक शेतकऱ्यांना (Farmer) बसत असलेला महागाईचा फटका चाऱ्याचे दर, दुधासाठी उपयुक्त असलेली ढेप खाद्यपदार्थ यांच्या किंमती वाढल्याने तसेच जनावरे सांभाळण्याचा खर्च या सर्व बाबींचा विचार करून शेतकऱ्यांच्या हितासाठी ही दरवाढ केल्याची प्रतिक्रिया दूध विक्रेत्यांनी दिली आहे. आता सर्वसामान्य नागरिकांना (Petrol) पेट्रोल डिझेल व घरात स्वयंपाकासाठी लागणारे तेल किराणामाला पाठोपाठ दुधाची दरवाढ ही स्वीकारावी लागणार आहे.

डेअरींवर दरवाढीचे फलक

मोठ्या दूध कंपनीच्या पिशवी दुधापेक्षा खुल्या पद्धतीने विक्री करणाऱ्या दूध डेअरीमध्ये दुधाचा दर्जा चांगला असल्याने ग्राहक पसंती देतात. एकट्या मयूर दूध डेअरीत दिवसाला 800 ते 900 लिटर दूध विकले जाते. म्हशीचे दूध 60 रुपयांऐवजी आता 70 रुपये प्रति लिटर झाले असून गाईचे दूध 40 ऐवजी 50 रुपये लिटर झाल्याने ग्राहकांना सूचित करण्यासाठी नंदुरबार शहरातील बहुतांश दूध विक्रेत्यांच्या डेअरीवर दूध दरवाढ बाबतचे फलक झळकविण्यात आले आहे.

दूध उत्पादकांकडूनही अंमलबजावणी

दूध उत्पादक शेतकऱ्यांच्या हितासाठी घेतलेल्या या निर्णयाचे ग्राहकांना स्वागत करावे लागणार आहे. शहरी भागात याची अंमलबजावणी सुरू झाली असली तरी ग्रामीण भागात दरवाढीबाबत जास्त प्रभाव नाही. मात्र खेड्यावरून शहरी भागात घरोघरी जाऊन दूध वाटप करणारे दूध उत्पादक शेतकरीही याबाबत अंमलबजावणी करणार असल्याने दूध उत्पादक शेतकऱ्यांना दोन पैसे अधिक मिळणार आहे.