Nandurbar News : आमचूरच्या प्रक्रिया उद्योगासाठी ८ कोटींचा निधी; धडगाव आणि अक्कलकुवा तालुक्यात होणार उद्योग

सागर निकवाडे 

नंदूरबार : नंदुरबार जिल्ह्यातील धडगाव आणि अक्कलकुवा या दोन तालुक्यात मोठ्या प्रमाणात गावरान कैरीचे (Nandurbar) उत्पादन घेतलं जात असते. यामुळे कैरीपासून आमचूर तयार करण्यासाठी प्रक्रिया उद्योग आवश्यक आहे. याच प्रक्रिया उद्योगासाठी दोन्ही तालुक्यांना ८ कोटी रुपयांचा निधी मंजूर झाला आहे. 

कैरीवर प्रक्रिया करून त्याचे आमचुल तयार करण्यात येत असते. त्यामुळे स्थानिक आदिवासी नागरिकांना या आमचूर प्रक्रियेतून मोठ्या प्रमाणात रोजगार उपलब्ध होत असतो. मात्र योग्य बाजारपेठ उपलब्ध नसल्याने स्थानिक पातळीवर कच्चा माल विक्री करावा लागत होता. आदिवासी दुर्गम भागात स्थानिक पातळीवर रोजगार निर्माण व्हावा; यासाठी नंदुरबार जिल्ह्यातील धडगाव, अक्कलकुवा (Akkalkuwa) तालुक्यात प्रत्येक तालुक्यात आमचूरच्या प्रक्रिया उद्योगासाठी मंत्री डॉ. विजयकुमार गावित (Vijaykumar Gavit) यांचा प्रयत्न सुरु होता. 

मंत्री गावित यांच्या प्रयत्नांना यश मिळाले असून आमचूल प्रक्रिया उद्योगांसाठी या दोनही तालुक्यांसाठी सुमारे सव्वा आठ कोटींचा निधी मंजूर करण्यात आला आहे. या निधी मंजुरीमुळे दोन्ही तालुक्यात उद्योग सुरु होतील. यामुळे स्थानिक आदिवासी बांधवांना याचा मोठा लाभ होणार आहे.