Navapur Fire: वडदे गावात किराणा दुकानाला भीषण आग; संसार जळून खाक, एकाचा मृत्यू

सागर निकवाडे , साम प्रतिनिधी

नवापूर तालुक्यातील वडदे गावात एका दुकानाला भीषण आग (fire) लागल्याची घटना घडली. या घटनेमध्ये एका व्यक्तीचा आगीत होरपळून मृत्यू झालाय. यावेळी नातेवाईकांनी प्रचंड आक्रोश केला प्रत्यक्षदर्शीकडून मिळालेल्या माहितीनुसार वडदे गावात एका घरामध्ये किराणा दुकान (Grocery store) चालवत होते.

आज दुपारी अचानक दुपारी शॉर्ट सर्किट होऊन दुकानाला आग लागल्याची घटना घडली. यात एका ७० वर्षीय व्यक्तीचा मृत्यू झालाय. या मृत व्यक्तीचे नाव पाऱ्या काथुड्या कोकणी असं होतं. आगीत सापडल्याने ते गंभीर जखमी झाले. त्यांना खासगी वाहनातून उपचारासाठी खांडबारा ग्रामीण रुग्णालयात दाखल करण्यात आले, परंतु प्रकृती गंभीर असल्याने पुढील उपचारासाठी नंदुरबार जिल्हा रुग्णालयात रवाना करण्यात आले.

जिल्हा रुग्णालयात उपचारादरम्यान त्या वयोवृद्ध व्यक्तीचा मृत्यू झाला. दरम्यान दुकानाला लागलेल्या आगीत संपूर्ण घर व दुकान जळून खाक झाले आहे. हजारो रूपयांचे नुकसान झाल्याची माहिती स्थानिकांनी दिलीय. वडदे गावातील एका घरात छोटसं किराणा दुकान चालवलं जात होतं.

आग लागल्याने ग्रामस्थ आजूबाजूच्या नागरिकांनी मिळेल त्या साधनाने आग विझवण्याचा प्रयत्न केला परंतु आगीने तात्काळ रुद्ररूप धारण केले. मोठा पेट घेतल्यामुळे आगीत दुकानासह घर जळून खाक झाले. या आगीमध्ये संसार उपयोगी साहित्य व किराणातील किराणा संपूर्ण जळून खाक झाला. या आदिवासी कुटुंब आर्थिक संकटात सापडला आहे. शासनाने आगीचा पंचनामा करून तात्काळ नुकसान भरपाई द्यावी, अशी मागणी नातेवाईकांनी केलीय.