Nandurbar Crime : ताप्ती गंगा एक्सप्रेस मधल्या हल्ल्यातील एका जखमीचा मृत्यू; नातेवाईक आक्रमक

सागर निकवाडे 

नंदुरबार : ताप्ती गंगा एक्सप्रेसमध्ये बसण्यावरून प्रवाशांमध्ये वाद निर्माण होऊन या वादात एकाने दोन प्रवाशांवर जीवघेणा हल्ला केल्याची घटना नंदुरबार रेल्वे स्थानकावर रविवारी दुपारी घडली होती. यात दोघेजण गंभीर जखमी झाले होते. दरम्यान यातील एकाचा उपचारादरम्यान मृत्यू झाल्याने खळबळ उडाली आहे. दरम्यान घटनेनंतर मृताचे नातेवाईक आक्रमक झाले आहेत.  

चेन्नईहून जोधपुरकडे जाणाऱ्या ताप्ती गंगा एक्सप्रेसमध्ये रविवारी (२ फेब्रुवारी) दुपारी ताप्ती गंगा एक्सप्रेसमध्ये भुसावळवरून चढलेल्या एका प्रवाशाची रेल्वेत अगोदरच बसलेल्या दोन राजस्थानी प्रवाशांसोबत बसण्याच्या जागेवरून वाद झाला होता. या वादातून संबंधिताने नंदुरबार रेल्वे स्थानकावर आपल्या मित्रांना बोलावून दोन प्रवाशांवर हल्ला केला होता. यात दोघे गंभीर जखमी झाले होते. त्यांना शासकीय रुग्नालयात उपचारासाठी दाखल करण्यात आले होते.

उपचारादरम्यान एकाचा मृत्यू 

दरम्यान या घटनेत जखमी असलेल्या दोघांमधील सुमेरसिंग जबरसिंग (वय २४) या युवकाचा उपचारा दरम्यान मृत्यु झाला आहे. अतिरक्त स्त्राव झाल्याने रात्री उशीरा त्याचा मृत्यू झाला असून लोहमार्ग पोलीसांनी रात्री उशीरा या घटनेप्रकरणी खुनाचा गुन्हा दाखल केला आहे. दरम्यान या घटनेतील आरोपी अद्याप फरार आहे. तर दुसऱ्या जखमी प्रवाशावर उपचार सुरु आहेत. तर घटनेतील मृत झालेल्या तरुणाचे २० फेब्रुवारीला विवाह होता. 

मृताचे नातेवाईक आक्रमक 
चाकू हल्ल्यात मृत्यू झालेल्या युवकांचे नातेवाईक आक्रमक झाले आहेत. यावेळी नंदुरबार जिल्हा रुग्णालयासमोर करनी सेनेने आक्रमक भूमिका घेतली असून पोलीस जोपर्यंत आरोपींना अटक करत नाही; तोपर्यंत मृतदेह ताब्यात न घेण्याचा पवित्रा घेतला आहे. यामुळे येथे तणावाचे वातावरण निर्माण झाले आहे. पोलीस देखील येथे दाखल झाले असून पोलीस आता काय भूमिका घेतात हे पाहणे महत्वाचे ठरणार आहे.