Nanded News: खुल्या प्रवर्गातून विजयी; तरीही जात वैधता प्रमाणपत्र न दिल्याच्या कारणावरून केले अपात्र

संजय सूर्यवंशी

नांदेड : नांदेडमधील निवडणूक विभागाच्या अजब कारभारामुळे एका ग्रामपंचायत (Grampanchayat) सदस्याला दोन वर्षांपासून मनस्ताप सहन करावा लागत आहे. खुल्‍या प्रवर्गातून निवडणूक लढवून विजयी झाले. तरीही (Nanded News) निवडणूक विभागाकडून जात वैधता प्रमाणपत्र न दिल्‍याच्‍या कारणावरून सदस्‍याला अपात्र करण्यात आले आहे. (Maharashtra News)

लोहा तालुक्यातील माळाकोळी ग्रामपंचायत सदस्य असलेले केशव तिडके यांनी गेली तीन वेळा सर्वसाधारण खुल्या प्रवर्गातून निवडणूक लढवून ते विजयी झाले. दोन वर्षांपूर्वी त्यांना लोहा तहसील कार्यालयाच्या निवडणूक (Election) विभागाने जात वैधता प्रमाणपत्र सादर करण्याची नोटीस बजावली. मुळात सर्वसाधारण ओपन गटातून निवडणूक लढवल्याने जात वैधता प्रमाणपत्र सादर करण्याचा प्रश्नच उद्भवत नाही. तरी तिडके यांनी लोहा तहसील कार्यालय आणि नांदेड जिल्हाधिकारी कार्यालयात सर्व आवश्यक कागदपत्रे सादर केली.

तरीही जिल्‍हाधिकारींचे अपात्रचे आदेश

दोन्ही कार्यालयात झालेल्या सुनावणीस हजर राहून तिडके यांनी माहिती सादर केली. तरी पुन्हा जिल्हाधिकाऱ्यांच्या आदेशाने त्यांना अपात्र करण्यात आले. याबाबत लोहा तहसील कार्यालयात तिडके यांनी पुन्हा संपर्क केल्यानंतर जिल्हाधिकारी कार्यालयाला कळवले जाईल, असे सांगण्यात आले. या सर्व भोंगळ कारभारामुळे मात्र गेल्या दोन वर्षांपासून तिडके यांना मनस्ताप सहन करावा लागतोय.