Nanded News: नागपंचमीच्या दिवशी नागबर्डीमध्ये भरली नागदेवतेची मोठी यात्रा

>> संजय सूर्यवंशी

नांदेडच्या कंधार तालुक्यातील गुंडा नागबर्डी येथे नागपंचमीच्या दिवशी नागदेवतेची मोठी यात्रा भरली. निसर्गाचे संवर्धन आणि संगोपनाची परंपरा ही यात्रा चालवत आहे. या यात्रेत हजारो भाविकांनी येऊन नागोबाचे दर्शन घेतलं. नवसाला पावणारा नागोबा, अशी याची ख्याती आहे.

बाहेर देशातून बहीण-भाऊ उदरनिर्वाह करण्यासाठी कंधार तालुक्यातील दिंडा, गुंडा, बिंडा या गावाच्या परिसरात फिरत ते नागबर्डी माळरानावर येऊन एक मालकाची जनावरे चारत होते. यावेळी नागोबाच्या वारुळाला भावाने चार ते पाच खडे मारताच नागराज जागृत होऊन त्या भावाला नागदेवताने दंश केला.

त्याठिकाणी असलेल्या लिंबाच्या झाडाच्या पालाचा रस भावाला पाजल्यानंतर तो जिवंत झाला, अशी आख्यायिका सांगितली जाते. नागराजाची मूर्ती तेव्हापासून आहे. तेव्हापासून लिंबाचे झाड तोडले जात नाही. झाडे तिथेच कुजली तरी शेतकरी झाड तोडत नाहीत.

दरवर्षी नागपंचमीला या माळरानावर नागराजाला दूध पाजविले जाते. नागराज केवळ नागपंचमीच्या दिवशीच त्या वारुळात येत असतो, अशी भाविकांची श्रद्धा आहे. (Latest Marathi News)

गुंडा नागबर्डी इथल्या सातशे वर्षांची परंपरा असलेल्या नागराजाच्या यात्रेला भाविकांची प्रचंड गर्दी झालीय. निसर्गाचे संवर्धन आणि संगोपन करणारे देवस्थान म्हणून नागबर्डी प्रसिद्ध आहे. दरवर्षी पंचमीच्या निमित्ताने इथे यात्रा भरत असते. या ठिकाणी तीर्थक्षेत्र विकास योजनेतून विकास कामे केले जात असून हे ठिकाण पर्यटनस्थळ म्हणून विकसित करणार असल्याचे देवस्थानचे अध्यक्ष प्रवीण पाटील चिखलीकर यांनी सांगितलय.