लव्ह स्टोरीचा भयंकर अंत! तरुणाची निर्घृण हत्या; मुलीचा बाप अन् भाऊ हाती लागला अन् गूढ उकललं

संजय सूर्यवंशी, नांदेड | साम टीव्ही

१७ वर्षांच्या युवकाच्या हत्येनं अख्खा नांदेड जिल्हा हादरून गेला. प्रेम प्रकरणातून या तरुणाची हत्या झाल्याची माहिती समोर आली आहे. त्याचे गावातीलच एका मुलीवर प्रेम होते. पण युवकाच्या हत्येनं या प्रेमाचा भयंकर शेवट झाला. पोलिसांनी संशयावरून मुलीच्या वडिलांना आणि भावाला ताब्यात घेतल्यानंतर या हत्येच्या घटनेचं गूढ उकललं.

नांदेडमधील हिमायतनगर तालुक्यातील कांडली या गावात ही धक्कादायक आणि हादरवणारी घटना घडली. नकुल पावडे असं हत्या झालेल्या या मुलाचं नाव आहे. तो अवघ्या १७ वर्षांचा होता. गावातीलच मुलीवर त्याचा जीव जडला होता. त्या दोघांचेही प्रेमसंबंध होते. पण याच प्रेमसंबंधांनी घात केला. नकुलला आपला जीव गमवावा लागला.

हत्या करून मृतदेह विहिरीत फेकला

गावातील मुलीवर प्रेम करणारा नकुल शनिवारपासून बेपत्ता होता. त्याची हत्या करण्यात आली होती. हत्येनंतर आरोपींनी त्याचा मृतदेह विहिरीत फेकला होता. भोकर तालुक्यातील सिंगारवाडी शिवारातील विहिरीत त्याचा मृतदेह फेकून देण्यात आला होता. पोलीस तपासात धक्कादायक माहिती समोर आली. मुलीच्या वडील आणि भावानेच त्याची हत्या केल्याचे उघड झाले आहे.

असा झाला हत्येचा उलगडा

प्राथमिक माहितीनुसार, प्रेमसंबंधांतून नकुलची हत्या झाली. त्याची हत्या करून मृतदेह सिंगारवाडी शिवारातील विहिरीत फेकण्यात आला होता. गावातीलच मुलीसोबत प्रेमसंबंध असल्याची माहिती समोर आली होती. शनिवारपासून नकुल बेपत्ता होता.पोलिसांनी या प्रकरणात संशयित म्हणून मुलीच्या बापाला आणि भावाला ताब्यात घेतले होते. चौकशीत त्यांनी नकुलची हत्या केल्याची कबुली दिली.दोन्ही आरोपींना अटक करण्यात आली आहे. त्यांना न्यायालयानं दोन दिवसांची पोलीस कोठडी दिली आहे.