Nanded BJP : नांदेडमध्ये भाजपला पुन्हा धक्का; माजी मंत्री माधवराव पाटील किन्हाळकर यांचा राजीनामा

संजय सूर्यवंशी

नांदेड : नांदेड जिल्ह्यात भाजपला खिंडार पडले आहे. माजी केंद्रीय मंत्री सुर्यकांता पाटील यांनी भाजपचा राजीनामा देऊन राष्ट्रवादी पक्षात प्रवेश केला. त्यानंतर आता नांदेडमध्ये भाजपाला दुसरा धक्का बसला आहे. डॉ. माधवराव पाटील किन्हाळकर यांनी भाजपला रामराम केला आहे.

नांदेड (Nanded) जिल्ह्यात भाजपची ताकद वाढत असताना एकामागून एक दोन धक्के भाजपला बसले आहेत. काही दिवसांपूर्वी भाजप नेत्या तथा माजी केंद्रीय मंत्री सूर्यकांता पाटील यांनी भाजपशी सोडचिठ्ठी केली. यानंतर त्यांनी राष्ट्रवादीमध्ये प्रवेश केला होता. यानंतर नांदेडमध्ये भाजपाला दुसरा धक्का बसला असून माधवराव पाटील किन्हाळकर यांनी (BJP) भाजपाचे प्रदेशाध्यक्ष चंद्रशेखर बावनकुळे यांच्याकडे  भाजपाच्या प्राथमिक सदस्यत्वाचा राजीनामा दिला आहे. यामुळे नांदेड जिल्ह्यात भाजपला मोठे खिंडार पडले आहे. 

दहा वर्षांपूर्वी माधवराव पाटील किन्हाळकर यांनी (NCP) राष्ट्रवादी काँग्रेस पक्ष्यातून भाजपमध्ये प्रवेश केला होता. परंतु किन्हाळकर यांना मागील दहा वर्षात भाजपने कुठलीही जवाबदारी दिली नाही. त्यामुळे ते भाजपात नाराज होते. माजी केंद्रीय मंत्री सुर्यकांता पाटील यांच्या नंतर त्यांनी देखील भाजपा सोडण्याचा निर्णय घेतला. यानंतर आज किन्हाळकर यांनी भाजपला राम राम ठोकला आहे. आता ते पुन्हा राष्ट्रवादी शरद पवार गटात जाण्याची शक्यता आहे.