Crime News : नालासोपाऱ्यात 'दृश्यम'; बॉयफ्रेंडच्या मदतीनं नवऱ्याची हत्या, घरातच पुरला मृतदेह, असा झाला उलगडा

मनोज तांबे

नालासोपारा : कोणाला संशय येऊ नये, यासाठी मृतदेह नव्याने बांधकाम सुरु असलेल्या पोलीस स्टेशनमध्येच पुरण्यात आल्याचे दृश्य अजय देवगणच्या दृश्यम या चित्रपटात पाहण्यास मिळाले. याच कथेला अनुरूप अशी हत्येची घटना नालासोपारा मध्ये उघडकीस आली आहे. एका महिलेेने प्रियकराच्या मदतीने पतीची हत्या करून मृतदहे घरातील जमिनीत गाडल्याची घटना सोमवारी सकाळी उघडकीस आली आहे.

नालासोपारा येथे उघडकीस आलेल्या हत्येच्या घटनेत विजय चव्हाण (वय ३५) असे मृत व्यक्तीचे नाव आहे. दरम्यान विजय हा मागील १५ दिवसांपासून बेपत्ता होता. यामुळे बिलालपाडा येथे राहणारे विजय चव्हाण याचे दोन भाऊ त्याचा शोध घेत होते. मात्र तो आढळून आला नाही. याच दरम्यान दोन दिवसांपूर्वी विजयची पत्नी कोमल चव्हाण हि देखील बेपत्ता झाली होती. यामुळे परिवार अधिक गोंधळून गेला होता. 

प्रियकरासोबत पत्नी फरार 

दरम्यान कोमल बेपत्ता झाल्यानंतर तिच्या पाठोपाठ शेजारी राहणारा मोनू शर्मा हा तरुण देखील बेपत्ता झाला होता. कोमल चव्हाण आणि मोनू शर्मा यांच्यात प्रेमसंबंध होते आणि त्यातून ते दोघे पळून गेल्याचे पोलीस तपासात निष्पन्न झाले आहे. यामुळे पोलिसात तक्रार दाखल करण्यात आली असून पोलिसांकडून दोघांचाही शोध सुरु आहे. 

टाईल्सच्या वेगळ्या रंगामुळे घटना उघड  
दरम्यान, सोमवारी सकाळी विजय चव्हाण यांचे दोन्ही भाऊ गडगापाडा येथील ओम साई या निवासस्थानी आले. यावेळी घरातील टाईल्सचे रंग वेगळे असल्याचे दिसून आले. यानंतर त्यांनी टाईल्स खोदून काढली असता याठिकाणाहून दुर्गंधी येऊ लागली. यानंतर त्यांनी तात्काळ पोलिसांना बोलावले. सध्या पेल्हार पोलीस घटनास्थळी असून लाद्या काढून मृतदेह शोधण्याचे काम सुरू आहे.