Nagpur News: नागपूरच्या कन्हान नदीत ४ जण बुडाले, NDRF कडून शोध सुरु

संजय डाफ, नागपूर

Nagpur Kanhan River: नदीमध्ये पोहण्यासाठी उतरलेले चार तरुण बुडाल्याची घटना नागपूरमध्ये घडली आहे. नागपूर जिल्ह्यातील सावनेर तालुक्यातील वाकी येथे ही घटना घडली आहे. या घटनेची माहिती मिळताच स्थानिक ग्रामस्थ आणि पोलिसांनी (Nagpur Police) घटनास्थळी धाव घेतली आहे. चारही तरुणांचा शोध सुरु आहे.

मिळालेल्या माहितीनुसार, कन्हान नदी (Kanhan River) परिसरामध्ये फिरण्यासाठी काही तरुण आपल्या मैत्रिणींसोबत गेले होते. त्याच वेळी हे सर्वजण नदीमध्ये पाोहण्यासाठी उतरले. पण पाण्याचा अंदाज न आल्यामुळे तीन तरुण आणि एक तरुणी नदीमध्ये बुडाले. तर सुदैवाने दोन तरुणी बचावल्या आहेत.

विजय ठाकरे, सानिया म्हरसकोल्हे, अंकुश बघेल आणि अर्पित अशी नदीमध्ये बुडालेल्यांची नावं आहेत. या चारही जणांचा शोध सुरु आहे. या चारही जणांचा मृत्यू झाल्याची शक्यता व्यक्त केली जात आहे. स्थानिक ग्रामस्थ, पोलीस आणि एनडीआरएफकडून त्यांचा शोध सुरु आहे.