Nagpur Fire News: कचऱ्याची विल्हेवाट लावताना मोठी दुर्घटना! नागपुरातील कंपनीत भीषण आग; एका कर्मचाऱ्याचा होरपळून मृत्यू

Nagpur News: नागपूरमधून एक दुर्देवी घटना समोर आली आहे. नागपूर जवळील बाजारगाव येथील इकॉनॉमिक एक्सप्लोझिव्ह कंपनीत आज (१३, ऑगस्ट) भीषण आग लागली. या आगीमध्ये एका कर्मचाऱ्याचा दुर्देवी मृत्यू झाला तर आणखी एक जण गंभीर जखमी झाला आहे. (Nagpur News)

याबाबत अधिक माहिती अशी की, नागपूर (Nagpur News) जवळील बाजारगाव येथील इकॉनॉमिक एक्सप्लोझिव्ह कंपनीत भीषण आगीची घटना समोर आली आहे. इकॉनॉमिक एक्सप्लोझिव्ह कंपनीने उत्पादित केलेल्या टाकाऊ साहित्याची विल्हेवाट लावत ते नष्ट करत असताना आग लागली.

सकाळी पावणेसातच्या सुमारास अचानक या साहित्यातून जोरदार ज्वाला निघाली. त्यामुळे या कचऱ्याची विल्हेवाट लावणारे दोन कामगार गंभीर जखमी झाले. जखमी कामगारांना तात्काळ नागपुरच्या खासगी रुग्णालयात दाखल केले होते.

यावेळी उपचारादरम्यान एका कामगाराचा मृत्यू झाला. प्रतिक कळसकर असे मृत कामगाराचे नाव आहे. सुनील शेंद्रे या जखमी कामगारावर सध्या रुग्णालयात उपचार सुरू आहेत. दरम्यान, या दुर्घटनेत मृत्यू झालेल्या कामगाराला कंपनीकडून २२ लाखांची मदत करण्यात आली आहे. (Latest Marathi News)