Nagpur Crime: नागपूरमध्ये रक्तरंजित थरार! तरुणावर तलवार अन् चाकून सपासप वार, वाचवायला गेलेल्या २ मित्रांनाही सोडलं नाही

• नागपूर खापरखेडा येथे रक्तरंजित थरार

• जुन्या वादातून तरुणावर तलवार अने चाकूने हल्ला

• तरुणाला वाचवायला गेलेल्या दोन मित्रांवरही हल्ला

• या घटनेचा सीसीटीव्ही व्हिडीओ व्हायरल

पराग ढोबळे, नागपूर

नागपूरमध्ये रक्तरंजित थरार घडला. रात्री भररस्त्यात तरुणांवर जीवघेणा हल्ला करण्यात आला. नागपूर जिल्ह्यातील खापरखेडा पोलिस ठाण्यापासून काही अंतरावरील मुख्य बाजारपेठेत रविवारी रात्री ही घटना घडली. जुन्या वादातून भररस्त्यात तलवारी, फावडे आणि चाकूंनी तरुणावर सशस्त्र हल्ला करण्यात आला. त्याला वाचवण्यासाठी गेलेल्या त्याच्या दोन मित्रांवर देखील हल्ला करण्यात आला. या घटनेमध्ये तिघेही जखमी झाले आहेत. एकाची प्रकृती गंभीर आहे. या घटनेचा थरारक व्हिडीओ व्हायरल होत आहे.

मिळालेल्या माहितीनुसार, जुन्या वादातून दगडी चाळ टोळीतील आरोपींनी हातात तलवार, फावडे आणि चाकू घेऊन परिसरात धुमाकूळ घातला. या हल्ल्यात हिमांशू रवी कडू हा तरुण गंभीर जखमी झाला. त्याला वाचवण्यासाठी धावून गेलेले रक्षित कापसे आणि रोहित मेश्राम यांनाही आरोपींनी बेदम मारहाण करण्यात आली. यामध्ये हे दोघेही गंभीर जखमी केले. रक्षितची प्रकृती चिंताजनक आहे. तिघांवर सध्या रुग्णालयात उपचार सुरू आहेत.

या प्रकरणात सूरज कावळे (वय २५ वर्षे), शुभम उर्फ शेरू उईके (वय २५ वर्षे), संघर्ष बागडे (वय १९ वर्षे), साहिल उर्फ बूटऱ्या बागडे (वय २२ वर्षे) आणि सुदामा मधुकर छापाडहाके (वय २५ वर्षे) यांच्यासह इतर साथीदारांवर गुन्हा दाखल करण्यात आला आहे. यापैकी सूरज कावळे आणि शुभम उर्फ शेरू उईके हे कुख्यात सराईत गुन्हेगार आहेत. त्यांना नागपूर शहर आणि नागपूर ग्रामीण जिल्ह्यातून तडीपार करण्यात आल्याची माहिती आहे.

मारहाणीनंतर आरोपींनी "दगडी चाळीत येऊन दाखवा" अशी धमकी दिल्याचे सांगितले जात आहे. त्यानंतर सुमित आणि डग्गम हे दगडी चाळीकडे जात असताना त्यांनी वाटेत हिमांशूला सोबत घेतल्याची माहिती सूत्रांनी दिली. दरम्यान, रविवारी रात्री हिमांशू जीवाच्या भीतीने घराच्या दिशेने पळत असताना त्याला वाचवण्यासाठी रक्षित कापसे आणि रोहित मेश्राम बॅरिकेड ओलांडून आले. मात्र आरोपींनी रक्षितवर धारदार शस्त्राने हल्ला केला. त्यानंतर आरोपींनी दुचाकीवरून हिमांशूचा पाठलाग करत त्याला घराजवळ गाठले आणि तलवार आणि चाकूने वार केले. "मार डाला" अशी आरडाओरड करत आरोपी घटनास्थळावरून पसार झाले. या घटनेमुळे परिरात भीतीचे वातावरण आहे.