Nagpur Crime : मुलगा-सून मुंबईला गेले, घरात आईची निर्घुण हत्या; नागपूरात भयकंर घडलं

पराग ढोबळे, साम टीव्ही, प्रतिनिधी

Nagpur Crime News : नागपूरमधून एक धक्कादायक प्रकार समोर आला आहे. नागपूरच्या वाठोडा पोलीस स्टेशनच्या हद्दीत एका ५५ वर्षीय महिलेची निर्घुण हत्या करण्यात आली. या महिलेचा मृतदेह तिच्या घरात पडून होता. कुटुंबीय घरी परतल्यानंतर हा प्रकार उघडकीस आला. महिलेच्या हत्येने परिसरात मोठी खळबळ उडाली आहे.

मिळालेल्या माहितीनुसार, नागपूरच्या वाठोडा पोलीस ठाण्याच्या हद्दीत ही घटना घडली आहे. एका महिलेची उशीने गळा दाबून हत्या करण्यात आली. तिचा मुलगा आणि सून हे मुंबईला राहतात. ते नागपूरला त्यांच्या घरी परतल्यानंतर हा धक्कादायक प्रकार सर्वांसमोर आला. तोपर्यंत महिलेचा मृतदेह तिच्या घरात तसाच पडून होता.

सुनीता मधुकर भोयर असे मृत महिलेचे नाव असल्याची माहिती पोलिसांनी दिली आहे. सुनीता भोयर या वाठोडा पोलीस स्टेशनच्या हद्दीतील सेनापती नगर येथील रहिवाशी आहेत. सुनीता यांची त्यांच्या घरातच गळा दाबून निर्घुणपणे हत्या करण्यात आली. मारेकरी हा परिचयातील असल्याचा संशय पोलिसांनी व्यक्त केला जात आहे.

सुनीता यांचा मुलगा आणि सून मुंबईहून घरी परतल्यावर त्यांनी दरवाजा उघडला, तेव्हा घरात मृतदेह आढळून आला. दोघांनी लगेचच पोलिसांना बोलावले. पोलिसांनी पंचनामा केला असता उशीने गळा आवळून त्यांची हत्या झाल्याचे निष्पन्न झाले. या घटनेचा तपास वाठोडा पोलीस करत आहेत. या मृत्यू प्रकरणामुळे परिसरात हळहळ व्यक्त केली जात आहे.