Nagpur Breaking News: डबा पार्टी जिवावर बेतली! मटकाझरी तलावात बुडून तिघांचा मृत्यू; कुटुंबियांवर शोककळा

पराग ढोबळे, नागपूर|ता. ३१ मे २०२४

गेल्या काही दिवसांपासून राज्यातील विविध भागात बुडून मृत्यू झाल्याच्या घटना वारंवार समोर येत आहेत. नागपुरमधून अशीच धक्कादायक घटना घडली असून उमरेड तालुक्यतील कुही पोलीस स्टेशन अंतर्गत मटकाझरी तलावात बुडून तिघांचा दुर्दैवी मृत्यू झाला आहे. या घटनेने परिसरात हळहळ व्यक्त होत आहे.

याबाबत सविस्तर माहिती अशी की, नागपुरमधील उमरेड तालुक्यतील कुही पोलीस स्टेशन अंतर्गत मटकाझरी तलावात बुडून तिघांचा मृत्यू झाल्याची धक्कादायक घटना समोर आली आहे. एक लहान मुलगा आणि दोन पुरुषांचा मृतांमध्ये समावेश आहे. या दुर्दैवी घटनेने मृतांच्या कुटुंबियांवर दुःखाचा डोंगर कोसळला आहे.

समोर आलेल्या माहितीनुसार, नागपूरच्या वाठोडा परिसरातील तीन कुटुंब मटकाझरी तलावर डबा पार्टी करण्यासाठी गेले होते. यावेळी गुरूवारी दुपारच्या सुमारास या कुटुंबातील तिघे तलाव्यात बुडाले होते. आज सकाळी या तिघांचेही मृतदेह सापडले. याबाबतची माहिती मिळताच पोलिसांनी धाव घेत मृतदेह शवविच्छेदनासाठी पाठवले.

दरम्यान, राज्यात गेल्या दोन आठवड्यांपासून बुडून मृत्यू झाल्याच्या घटना समोर आल्या आहेत. काही दिवसांपूर्वीच अहमदनगरमध्ये बुडलेल्या तरुणांचा शोध घेण्यासाठी निघालेली एसडीआरएफच्या जवानांची बोट उलटून मोठी दुर्घटना घडली होती. यामध्ये सहा जणांचा मृत्यू झाला होता तर वेंगुर्ले बंदरातही खलाश्यांची बोल उलटून चार जणांचा मृत्यू झाल्याचे समोर आले होते.