Hasan Mushrif : हसन मुश्रीफ यांची मुंबई हायकोर्टात धाव; काय आहे कारण?

सचिन गाड

Hasan Mushrif : ईडीने दाखल केलेला गुन्हा रद्द करण्याची मागणी करत राष्ट्रवादीचे नेते हसन मुश्रीफ यांनी मुंबई उच्च न्यायालयात धाव घेतली आहे.कोल्हापुरात दाखल करण्यात आलेला फसवणुकीचा गुन्हा रद्द करण्याची त्यांनी मागणी केली आहे.अंमलबजावणी संचालनालयाच्या खटल्यांमध्ये हेतू साधत कारवाई केली जात आहे, असा दावा मुश्रीफांनी केला आहे. (Latest Maharashtra Politics News)

सुरू असलेल्या याचिकेवर सुनावणी होईपर्यंत कोणतीही सक्तीची कारवाई करू नये. यासह आरोपपत्रही दाखल करू नये याबाबत पोलिसांना निर्देश देण्याची मागणी देखील हसन मुश्रीफ यांनी केली आहे.

कोल्हापुरातील मुरगूड पोलीस ठाण्यात मुश्रीफ यांच्याविरोधात २३ फ्रेब्रुवारी रोजी गुन्हा दाखल करण्यात आला होता. विवेक कुलकर्णी यांनी दाखल केलेल्या तक्रारीनुसार हा गुन्हा दाखल करण्यात आला. परंतू राजकीय हेतुने प्रेरित होतं माझ्या विरोधात हे एक षडयंत्र आहे, असं मुश्रीफ म्हणालेत. त्यामुळेच त्यांनी हायकोर्टात धाव घेतली आहे.

दाखल केलेल्या याचिकेद्वारे हसन मुश्रीफ यांनी पुढे म्हटलं आहे की, 'पहिले कंपनी कायद्याअंतर्गत पुणे सत्र न्यायालयात याचिका दाखल करण्यात आली. त्यामध्ये माझ्या मुलाला समन्स बजावण्यात आले. पुण्यात सुरू असलेल्या या कारवाईला पुढे उच्च न्यायालयाने स्थगिती दिली. त्यामुळे मला त्रास देण्याच्या हेतून कोल्हापूरात गुन्हा दाखल करण्यात आला आहे. मला मोठ्या आर्थिक गैरवैवहारात फसवण्याचा प्रयत्न केला जात आहे, असं त्यांनी म्हटलं आहे.

कोल्हापूरात गुन्हा दाखल करण्याचं कारण काय?

विवेक कुलकर्णी यांनी दाखल केलेल्या तक्रारीनुसार, हसन मुश्रीफ यांनी बैठका घेत अनेक व्यक्तींकडून १० हजार रुपये घेतले होते. पैसे भरलेल्या सर्व नागरिकांना पत्येक महिन्यात ५ किलो साखर आणि विविध आर्थिक लाभ मिळतील असं मुश्रीफ यांनी आश्वासन दिलं होतं. साल २०१२ मध्ये हा सर्व प्रकार घडला. तेव्हापासून मुश्रीफांनी सांगितल्याप्रमाणे काहीचं केलं नाही. या प्रकरणात त्यांनी ४० कोटींची रक्कम घेतल्याचं तक्रारीत म्हटलं आहे. त्यामुळेच हसन मुश्रीफांवर गुन्हा दाखल करण्यात आलाय.