पवनराजे निंबाळकर हत्याकांडाचा निकाल विरोधात लागला; ओमराजेंची पहिली प्रतिक्रिया, शिंदेंच्या शिवसेनेत जाणार की नाही केलं स्पष्ट

तब्बल २ वर्षानंतर पवनराजे निंबाळकर हत्याकांड प्रकरणात मुंबई न्यायालयाने माजी गृहमंत्री डॉ. पद्मसिंह पाटील यांच्यासह सर्व ९ आरोपींची निर्दोष मुक्तता केली आहे. पवनराजे निंबाळकर हत्याकांडाच्या निकालाकडे संपूर्ण महाराष्ट्राचे लक्ष लागले होते. अखेर या खटल्यात सर्व आरोपी निर्दोष सुटल्याने राजकीय वर्तुळात मोठी चर्चा सुरू झाली आहे. ओमराजे निंबाळकर शिंदेंच्या शिवसेनेत प्रवेश कऱणार का? अशी चर्चा सुरू झाली आहे. खटल्याचा निकाल कोर्टाने दिल्यानंतर ओमराजे निंबाळकर यांनी दिलेल्या प्रतिक्रियेने शिंदेंच्या शिवसेनेची धाकधूक वाढली आहे.

न्यायालयाच्या निकालावर प्रतिक्रिया देताना खासदार ओमराजे निंबाळकर यांनी आपली पुढची भूमिका स्पष्ट केली. "हा निकाल अत्यंत दुर्दैवी असून आम्ही याविरोधात उच्च न्यायालयात अपील करणार आहोत," असे ओमराजे म्हणाले. गेल्या २० वर्षांपासून आरोपींना शिक्षा व्हावी यासाठी तपास यंत्रणांसोबत आम्हीही मोठा लढा दिला, अशी आठवण त्यांनी करून दिली. कोर्टाचा निकाल असल्याने तो स्वीकारावाच लागेल, असे सांगत त्यांनी आता यावर अधिक भाष्य न करता उच्च न्यायालयात बाजू पटवून देण्याला आमचे प्राधान्य असेल आणि तिथून आम्हाला नक्कीच न्याय मिळेल, असा विश्वास व्यक्त केला.

ठाकरेंसोबत राहणार का?

मी कार्यकर्त्यांसोबत जाऊन धाराशिवमध्ये जाऊन निर्णय घेणार आहे. माझ्यासाठी कार्यकर्त्यांचा कौल महत्त्वाचा आहे. निकालाचा आणि राजकीय निर्णयाचा काहीही संबंध नाही, असे खासदार ओमराजे निंबाळकर म्हणाले.

CBI वरिष्ठ न्यायालयात दाद मागणार

पवनराजे निंबाळकर हत्या प्रकरणातील आरोपींना निर्दोष मुक्त करण्याच्या निर्णयाविरोधात CBI वरिष्ठ न्यायालयात दाद मागणार असल्याची माहिती मिळाली आहे. पवनराजे निंबाळकर हत्या प्रकरणात विशेष न्यायालयाने दिलेल्या निर्दोष मुक्तीच्या निकालाविरोधात केंद्रीय अन्वेषण ब्यूरो (CBI) वरिष्ठ न्यायालयात अपील करणार आहे. या निकालानंतर राज्याचे मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांनी केंद्रीय गृहमंत्री अमित शाह यांच्याशी प्रत्यक्ष चर्चा केली. या चर्चेनंतर अमित शाह यांनी CBI ला निकालाविरोधात वरिष्ठ न्यायालयात दाद मागण्याचे स्पष्ट निर्देश दिले आहेत.