मोठी बातमी! संदीप देशपांडे आणि संतोष धुरी प्रकरणात कोर्टाने पोलिसांना फटकारलं

मुंबई : मनसे नेते संदीप देशपांडे (MNS Sandeep Deshpande) आणि संतोष धुरी (MNS Santosh Dhuri) यांच्या केस प्रकरणी कोर्टाने पोलिसांना (Mumbai Police) फटकारले आहे. ही केस काल्पनिक असून कोणत्याही तथ्यावर आधारीत नाही असं स्पष्टीकरण कोर्टाच्या वतीने देण्यात आलं आहे. आरोपींमुळे इतरांचा जीवाला धोका होता, हा दावा कोर्टाने फेटाळून लावला आहे. ( MNS Sandeep Deshpande And Santosh Dhuri Case Court Slapped Mumbai Police)

जर संदीप देशपांडे आणि संतोष धुरी हे शिवतीर्थावर आले तेव्हाच पोलिसांनी त्यांना का ताब्यात घेतलं नाही असा सवाल देखील कोर्टाने पोलिसांना केला आहे. पोलिसांच्या हाती आरोपी लागले नाही त्यानंतर काल्पनिक केस उभी करण्यात आली असं प्रथमदर्शी दिसून येत आहे असं कोर्टाने यावेळी म्हटलं आहे.

काय आहे प्रकरण?

महाराष्ट्र नवनिर्माण सेनेचे अध्यक्ष राज ठाकरे यांनी मशिदीवरील भोंग्यांना विरोध करत ४ मे रोजी पक्षातील कार्यकर्त्यांना मशिदीसमोर हनुमान चालिसा लावण्याचे आदेश दिले होते. राज यांच्या आदेशानंतर ठिकठिकाणी मनसैनिकांनी भोंग्याविरोधात हनुमान चालीसा लावण्यास सुरूवात केली होती. दरम्यान, राज्यभरात पोलिसांनी मनसे कार्यकर्त्यांची धरपकड केली. याच दिवशी शिवाजी पार्क येथे पोलीस ताब्यात घेत असताना संदीप देशपांडे आणि संतोष धुरी यांनी आपल्या खासगी वाहनातून गनिमी काव्याने निघून जात पोलिसांच्या हातावर तुरी दिल्या. यावेळी झालेल्या गोंधळात एक महिला पोलीस कर्मचारी रस्त्यावर पडून जखमी झाली. त्यानंतर पोलिसांनी मनसेच्या या दोन्ही नेत्यांविरोधात गुन्हा दाखल केला होता.

पोलिसांनी दाखल केला होता गुन्हा

दरम्यान, सरकारी कामात अडथळा आणण्याच्या आरोपाखाली पोलिसांनी संदीप देशपांडे आणि संतोष धुरी यांच्यावर गुन्हा दाखल केला होता. त्यामुळे मनसेच्या दोन्ही नेत्यांवर अटकेची टांगती तलवार होती. या प्रकरणात पोलिसांनी संदीप देशपांडे यांचा चालक आणि मनसेचे शाखाध्यक्ष संतोष साळी यांना अटकही केली होती. संदीप देशपांडे आणि संतोष धुरी यांच्या अटकपूर्व जामीनावर 19 मे रोजी सुनावणी पार पडली होती. त्यावेळी दोन्ही बाजूंचा युक्तीवाद न्यायालयानं ऐकून घेतला न्यायालयाने संदीप देशपांडे आणि संतोष धुरी यांचा जामीन मंजूर केला.

Edited By - Satish Daud