'काही लोक 'कर भाषण घे रेशन तत्त्वावर भाड्यावर घेतलेली आहेत'; मनसेची सुषमा अंधारेंवर सडकून टीका

Raju patil News : शिवसेना उपनेत्या सुषमा अंधारे यांनी ''आमच्याकडे एक असा पठ्ठ्या आहे, त्याचा ‘उठ दुपारी आणि घे सुपारी’असाच कार्यक्रम असतो'', असं वक्तव्य मनसे अध्यक्ष राज ठाकरे यांच्यावर केल्यानंतर मनसे पदाधिकारी आक्रमक झाले आहेत. शिवसेना नेत्या सुषमा अंधारे यांनी राज ठाकरे यांच्यावर केलेल्या टीकेनंतर मनसे आमदार राजू पाटील यांनी देखील जोरदार प्रत्युत्तर दिलं आहे. (Latest Marathi News)

'काही लोक आहेत ते कर भाषण घे रेशन या तत्त्वावर भाड्यावर घेतलेली आहेत, अशा शब्दात मनसे आमदार राजू पाटील यांनी टीका केली आहे. (MNS Mla Raju Patil criticize Sushma Andhare)

मनसे आमदार राजू पाटील यांनी ट्विट करून शिवसेना नेत्या सुषमा अंधारे यांच्यावर टीका केली आहे. ''वरचा मजला रिकामा' असा मराठीत वाक्प्रचार आहे, परंतु आमच्याकडे एक सुशी ताई आहेत ज्यांच्या 'वरच्या मजल्यावर' घनदाट 'अंधार' आहे. आपण कधीकाळी कुणाविषयी काय बोललो होतो, हे त्यांना बिलकुल आठवत नाही.आणि त्याच अंधारामुळे त्या वाट्टेल ते बरळत असतात, अशा शब्दात राजू पाटील (Raju Patil) यांनी अंधारे यांच्यावर टीका केली आहे.

राजू पाटील यांनी सुषमा अंधारे यांच्या वक्तव्यावर प्रतिक्रिया देताना म्हणाले, ' काही लोक बोलताना कोणत्याही थराला जाऊन बोलत असतात. काही लोक आहेत, ते 'कर भाषण घे रेशन' या तत्त्वावर भाड्यावर घेतलेली आहेत. या लोकांच्या टीकेला महत्व देत नाही, मात्र कार्यकर्त्यांच्या भावना आहेत, त्यामुळं वाईट वाटतं म्हणून ट्विट केलं असे सांगितले. मनसे आमदार राजू पाटील यांच्या टीकेनंतर सुषमा अंधारे काय प्रत्युत्तर देणार, हे पाहवे लागणार आहे.