Mira Bhayandar News : रस्ता ओलांडताना बसची धडक; महिलेचा मृत्यू

महेंद्र वानखेडे 

मीरा भाईंदर : भाईंदर पूर्वेच्या बस स्पॉटवर एका महिलेचा बसच्या धडकेत दुर्दैवी मृत्यू झाल्याची घटना समोर आली आहे. यावेळी बस स्पॉटजवळ उभ्या असलेल्या संतप्त नागरिकांकडून बसच्या समोरील काचेची तोडफोड करण्यात आली. पोलिसांनी संबंधित बस चालकाला ताब्यात घेतले असून पुढील तपास नवघर पोलीस करत आहे.

भाईंदर (Bhayandar) पूर्वेच्या नवघर रोडजवळ शनि मंदिर समोर बस स्टँड असून या ठिकाणी सर्व बस स्थानक आहेत. गुरुवारी दुपारी साडे बाराच्या सुमारास दुर्गादेवी बिस्ट (वय ५८) ही महिला रोड क्रॉस करत असताना बसने धडक (Accident) दिली. यामध्ये महिलेचे पती देखील सोबत होते.  त्यांना देखील किरकोळ दुखापत झाली आहे. बस स्टँडवर उभ्या असलेल्या नागरिकांनी जखमी महिलेला रिक्षात टाकून रुग्णालयात उपचारासाठी नेण्याच्या अगोदर महिलेचा मृत्यू झाल्याची माहिती पोलिसांनी दिली.

संतप्त नागरिकांकडून बसची तोडफोड 
संतप्त जमावाने बसची तोडफोड केली. घटनास्थळी पोलिसांनी धाव घेत बस चालकाला पोलिस ठाण्यात आणले असता महिलेच्या नातलगांनी एकच गोंधळ घातला. ही बस मिरा भाईंदर महानगरपालिकेची असून या अगोदर देखील मिरा भाईंदर परिवहन बसने धडक दिल्याच्या अनेक घटना घडल्या आहेत. त्यामुळे परिवहनमध्ये भरती झालेले बस चालक यांची पडताळणी करणे गरजेचे असल्याचे बोलले जात आहे. सदर चालका विरोधात पोलिस ठाण्यात गुन्हा दाखल करण्यात येत आहे.