Midnight Shootout: दरोडा प्रकरणात फेक एन्काऊंटर ? अमोल खोतकरचा एन्काऊंटर की सुपारी?

सुप्रिम मसकर, साम प्रतिनिधी

छत्रपती संभाजीनगरमधील दरोडा प्रकरणात नवा ट्विस्ट समोर आलाय. पोलिसांनी एका संशयित गुन्हेगाराचा एन्काऊंटर केलाय. वाळूज एमआयडीसी परिसरातील उद्योजक संतोष लड्डा यांच्या घरातून 15 मे रोजी दरोडेखोरांनी तब्बल आठ किलो सोनं आणि 40 किलो चांदी असा कोट्यवधींचा ऐवज लंपास केला होता.

त्यानंतर याप्रकरणात 5 संशयितांना ताब्यात घेण्यात आले. त्याकडून मिळालेल्या माहितीच्या आधारे पोलिसांनी रेकॉर्डवरील गुन्हेगार अमोल खोतकर याला अटक करण्यासाठी सापळा रचला. मात्र त्यावेळी अमोलनं पोलिसांवर गोळाबार केला. त्यानंतर प्रत्युत्तरादाखल पोलिसांनी गोळीबार केला.

संशयित गुन्हेगार अमोल खोतकरच्या एन्काऊंटरनंतर खोतकर कुटुंबीयांनी पोलिस यंत्रणेवर गंभीर आरोप केलेत. पोलिसांनीच अमोलची हत्या केल्याचा आरोप त्याच्या वडिलांनी केलाय. या प्रकरणात पोलिसांनी दोन ते तीन कोटी रुपये घेतल्याचा गंभीर आरोपही केलाय. आम्हाला न्याय द्या, अशी मागणी खोतकर कुटुंबीयांनी केलीये.

दरम्यान संभाजीनगरमधील दरोड्यात काही पोलिसांचा सहभाग असल्याचा संशय सामाजिक न्याय मंत्री संजय शिरसाट यांनी व्यक्त केला होता. गेल्या काही दिवसांपासून संभाजीनगरमध्ये गुन्हे वाढलेत. गेल्या 10 दिवसात संभाजीनगरमध्ये 3 दरोड्यांच्या घटना घडल्यानं पोलिसांच्या कार्यक्षमतेवर प्रश्नचिन्ह उपस्थित झालं आहे.

संभाजीनगर गुन्ह्यांच्या विळख्यात

वाळुजच्या टोके शिवारात 5.5 लाखांचा दरोडा

मीसरवाडीत बांधकाम व्यावसायिकाचं अपहरण आणि खून

उद्योजक संतोष लड्डा यांच्या घरावर कोट्यवधींचा दरोडा

निलेश बागुल यांच्या घरातून दीड लाखांचा ऐवज लुटत दरोडा

एकीकडे खोतकर कुटुंबीयांकडून पोलिसांवर होणारे गंभीर आरोप आणि दुसरीकडे मंत्री संजय शिरसाटांचा संशय यामुळे संशयीत आरोपी आणि पोलिसांची ही खरच चकमक होती की फेक एन्काऊंटर असा प्रश्न उपस्थित होतोय.

संभाजीनगरात गुन्हेगारी वाढली आहे. पोलिसांचा वचक राहिला नाही. दरोडेखोराचे पोलिसांशी संबंध असल्यामुळेच हा फेक एन्काऊंटर झाला आहे का? गृहमंत्री फडणवीस या प्रकरणाची दखल घेणार का? निष्पक्ष तपास होऊन खऱ्या आरोपींना शिक्षा होणार का? याकडेचं राज्याचं लक्ष लागलंय.