Maval Heavy Rain : मुसळधार पावसाचा तडाखा; मावळ झाले जलमय, अनेक गावांचा संपर्क तुटला

दिलीप कांबळे
मावळ : राज्यभरात जोरदार पावसाचा तडाखा बसत आहे. मुसळधार पावसाने हाहाकार माजवला असून जनजीवन विस्कळीत झाले आहे. त्यानुसार मावळ परिसरात देखील मुसळधार पावसाचा जोरदार तडाखा बसला असून या पावसामुळे परिसरातील अनेक गावांचा संपर्क तुटला आहे. दरम्यान अजून दोन दिवस पावसाची शक्यता वर्तविण्यात आली आहे. 

राज्यात सुरु असलेल्या मुसळधार पावसाने मावळ तालुक्यात देखील हाहाकार माजवला आहे. गेल्या पाच दिवसांपासून सुरू असलेल्या मुसळधार पावसामुळे जनजीवन विस्कळीत झाले आहे. मुसळधार पावसामुळे नद्या- नाले तुडुंब भरून वाहू लागले असून अनेक गावांचा संपर्क तुटला आहे. कडधे, कोथुर्णे, धामणे या गावांचे पूल पाण्याखाली गेले असून नागरिकांना मोठ्या अडचणींना सामोरे जावे लागत आहे. धामणे व परिसरातील गावांचा संपर्क पूर्णपणे खंडित झाला आहे.

नदी- नाले वाहताय धोकेदायक पातळीवर 

सतत कोसळणाऱ्या पावसामुळे लोणावळा घाट माथ्यापासून ते तळेगाव, पवनानगर परिसरात नदी- नाले धोकादायक पातळीवरून वाहत आहेत. कडधे व कोथुरने येथील पूल पाण्याखाली गेल्याने शाळकरी मुलांसह शेतकऱ्यांना प्रवास करणे अशक्य झाले आहे. दरम्यान, पावसाचा जोर कायम राहिल्यास पवना, आंध्रा व इंद्रायणी नदीला पूरस्थिती निर्माण होण्याची शक्यता प्रशासनाने व्यक्त केली आहे. 

कुंडमळ्यातील अपघात ग्रस्त लोखंडी पूल गेला वाहून...
मावळात गेले चार- पाच दिवस मुसळधार पाऊस सुरू आहे. त्यामुळे नदी नाले ओसंडून वाहत आहे. कुंड मळ्यातील इंद्रायणी नदीनेही रुद्ररूप धारण केले आहे. दरम्यान दोन महिन्यापूर्वी कुंडमळ्यातील इंद्रायणी नदीवरील लोखंडी पूल कोसळून चार लोकांचा मृत्यू झाला होता. मात्र तो अपघात ग्रस्त पूल नदीपात्रातच ठेवण्यात आलेला होता. आता इंद्रायणी नदीने रुद्र रूप धारण केल्यामुळे हा लोखंडी पूल वाहून गेलेला आहे.