भोंग्यांवरून वाद पेटण्याची शक्यता; मालेगावच्या मौलानांचा मशिदीवरील भोंगे काढण्यास नकार

नाशिक - मनसे अध्यक्ष राज ठाकरे (Raj Thackeray)यांनी मशिदीवरील भोंगे काढण्याचा 3 मेपर्यंत अल्टिमेटम दिला आहे. मात्र या अल्टिमेटमला मानण्यास मालेगावच्या (Malegaon) मौलानांनी नकार दिला आहे. ऑल इंडिया इमाम काउन्सलिंगने मशिदीवरील भोंगे काढण्यास स्पष्ट नकार दिला आहे. अजान नमाजसाठी भोंगे आवश्यक असल्याचं त्यांनी म्हटलं आहे.

हे देखील पहा -

तसेच आपल्या राजकीय स्वार्थासाठी राज ठाकरे हा वाद वाढवत असल्याचा आरोप त्यांनी केला आहे. अजान हा नमाजचाच एक अविभाज्य घटक आहे. त्याला वेगळं करता येणार नाही. त्यामुळे अजान होतच राहणार. राज ठाकरेंच्या भूमिकेला जास्त महत्त्व देण्याची गरज नाही. माईक आणि भोंगे मशिदीवरच राहतील. त्यांना कुणीही बाहेर काढू शकणार नाही", अशी भूमिका मौलानांनी घेतली आहे.

राज ठाकरे सारखे लोक अशा प्रकारच्या वक्तव्यांमधून दोन समाजांमध्ये तेढ निर्माण करण्याचा प्रयत्न करतात. त्यांच्यामुळे दोन वेगवेगळ्या धर्माच्या नागरिकांमध्ये परस्परांप्रती द्वेष निर्माण होतो. तसेच सामाजिक वातावरण खराब होतं. अशा प्रकारचं वक्तव्य करणाऱ्यांवर कारवाई व्हायला हवी, जेणेकरुन पुन्हा कुणी दुसरा व्यक्ती अशा प्रकारचं वक्तव्य करणार नाही, अशी टीका मालेगावच्या मौलानांनी केली आहे.