Manoj Jarange: ना महायुतीला, ना महाविकास आघाडीला... निवडणुकीसाठी कुणालाही पाठिंबा नाही, मनोज जरांगेंची स्पष्ट भूमिका

अक्षय शिंदे, जालना | साम टीव्ही

महाराष्ट्रातील मुंबईसह २९ महापालिकांच्या निवडणुकीसाठी मतदानाला अवघे काही तास शिल्लक असतानाच मराठा आरक्षणासाठी आंदोलन करणारे मनोज जरांगे पाटील यांनी आपली भूमिका मांडली आहे. माझा मुंबईसह संपूर्ण महाराष्ट्रात होणाऱ्या महापालिकांच्या निवडणुकीत महायुती आणि महाविकास आघाडीसह कुणालाही पाठिंबा नाही, असे जरांगे पाटील यांनी स्पष्ट केले.

काही दिवसांपूर्वी मनोज जरांगे यांच्या नावानं पत्रकं प्रसिद्ध करून काही राजकीय पक्षांना महापालिका निवडणुकीत पाठिंबा असल्याच्या पोस्ट व्हायरल झाल्या होत्या. यानंतर मनोज जरांगेंनी स्वतः आपली भूमिका मांडली आहे. महायुती किंवा महाविकास आघाडीला असा कोणालाही महापालिका निवडणुकीत माझा पाठिंबा नाही. माझे जुने व्हिडिओ कुणी व्हायरल करत असतील तर ते चुकीचे आहे, असे जरांगे म्हणाले.

माझ्या नावाने कुणी पत्रकं प्रसिद्ध करत असतील तर त्यावर कुणीही विश्वास ठेवू नये. जर कोणी स्थानिक पातळीवर कुणाला पाठिंबा दिला असेल तर, तो त्यांचा व्यक्तिगत विषय असेल. त्याचा आमच्याशी कोणत्याही प्रकारचा संबंध नाही, असंही जरांगेंनी स्पष्ट केलं.

मराठा आरक्षणाला विरोध करणाऱ्या उमेदवाराला सहकार्य करू नका

मराठा समाज आरक्षणासाठी काही वर्षांपासून मनोज जरांगे पाटील लढा देत आहेत. याच मराठा आरक्षणाला आणि त्याची मागणी करणाऱ्या मराठा समाजाला विरोध करणाऱ्यांना सहकार्य करू नये, अशी मनोज जरांगेंची भूमिका आहे. सर्वांना विनंती आहे की निवडणुकीत आमचा कुणालाही पाठिंबा नाही. पण मराठा समाजालाचा विरोध करणारे आणि मराठा आरक्षणाला विरोध करणारे जे कोणी निवडणुकीत उभे असतील, त्यांना मात्र मराठा समाजाने सहकार्य करू नये, असे आवाहनही जरांगेंनी केले आहे.