Manoj Jarange Patil : मनोज जरांगे पाटील यांचा अपघात, लिफ्टमध्ये बिघाड झाल्यानंतर काय घडलं? सीसीटीव्ही फुटेज व्हायरल

योगेश काशिद, साम टीव्ही, प्रतिनिधी

Manoj Jarange Patil News : मराठा आंदोलक मनोज जरांगे पाटील हे आज बीड जिल्ह्याच्या दौऱ्यावर आहेत. ते बीड शहरातील शिवाजीराव हार्ड केअर सोनोग्राफी हॉस्पिटलमध्ये रुग्णाला भेट देण्यासाठी गेले होते. पण रुग्णालयाच्या दुसऱ्या मजल्यावर जात असताना लिफ्टमध्ये बिघाड झाला. लिफ्ट थेट जमिनीवर आदळली. या घटनेचे सीसीटीव्ही फुटेज समोर आले आहे.

मिळालेल्या माहितीनुसार, मनोज जरांगे पाटील हे त्यांच्या सहकाऱ्यांसह एका रुग्णाला भेटण्यासाठी बीड शहरामधील शिवाजीराव हॉस्पिटलमध्ये गेले होते. हॉस्पिटलमध्ये त्यांनी लिफ्टचा वापर केला. तांत्रिक अडचणींमुळे लिफ्टमध्ये बिघाड झाला. मनोज जरांगे आणि त्यांचे सहकारी ज्या लिफ्टमध्ये होते, ती लिफ्ट मध्येच अडकली.

आज (३ ऑगस्ट) दुपारी अडीच वाजता ही घटना घडली. दुसऱ्या मजल्यावर जात असताना लिफ्टमध्ये बिघाड झाला आणि लिफ्ट थेट खालच्या मजल्यावर जाऊन आदळली. यात मनोज जरांगे पाटील यांना मुक्का मार लागल्याची माहिती समोर आली आहे. लिफ्टचे दरवाजे तोडून जरांगे आणि त्यांच्या सहकाऱ्यांना बाहेर काढण्यात आले.

मराठा आरक्षणाशी संबंधित विविध मागण्या पूर्ण व्हाव्यात या उद्देशाने मराठा समाजाने एल्गार पुकारला आहे. मराठा आंदोलक मनोज जरांगे पाटील यांच्या नेतृत्त्वामध्ये २९ ऑगस्ट रोजी मुंबईच्या दिशेने मोर्चा निघणार आहे. या मोर्चाला आधीपेक्षा जास्त संख्येने मराठा समाज सामील होणार असल्याचे जरांगे पाटील यांनी म्हटले आहे.