Crime News: चिकनच्या दुकानामागं लघवी अन् वाद टोकाला; मालकानं सुऱ्यानं भोसकून एकाला संपवलं

चिकन शॉपजवळ लघवी केल्याच्या कारणावरून युवकाचा चाकूने भोसकून हत्या करण्यात आली आहे. ही थरकाप उडवणारी घटना छत्रपती संभाजीनगरमधील मुकुंदवाडी परिसरातील कुरेशी चिकन शॉपजवळ घडली आहे. या घटनेत एकाचा मृत्यू तर, दोघे जण गंभीर जखमी झाले आहेत. त्यांच्यावर सध्या स्थानिक रूग्णालयात उपचार सुरू आहेत. या प्रकरणी पोलिसांनी दुकानमालकासह पाच जणांना बेड्या ठोकल्या आहेत.

पोलिसांनी दिलेल्या माहितीनुसार, नितीन संकपाळ आपला भाऊ आणि मित्रासह स्थानिक हॉटेलमध्ये जेवायला गेले होते. त्यानंतर कुरेशी चिकन शॉपमागे लघुशंका करण्यासाठी थांबले. त्यावेळेस दुकानमालक मस्तान कुरेशी त्या ठिकाणी पोहोचला. त्याने नितीन यांच्यावर आक्षेप घेत वादाला सुरूवात केली. वाद विकोपाला गेला आणि हाणामारीला सुरूवात झाली.

संतापाच्या भरात कुरेशीनं मांस कापण्याचा चाकू घेतला आणि उपस्थित असणाऱ्या तिघांवर हल्ला केला. या हल्ल्यात नितीनचा जागीच मृत्यू झाला. तर, अन्य दोघे जण गंभीर असल्याची माहिती आहे. या प्रकरणाची माहिती पोलिसांना मिळताच त्यांनी घटनास्थळी धाव घेत तपासाला सुरूवात केली. पोलिसांनी या प्रकरणी ५ जणांना बेड्या ठोकल्या आहेत. अटक करण्यात आलेल्या आरोपींमध्ये मस्तान कुरेशी, समीर खान, बाबर शेख, साजिद कुरेशी आणि नासिर खान यांचा समावेश आहे.

पोलिसांनी आरोपींवर विविध कलमान्वये गुन्हा दाखल केला आहे. शुक्रवारी पाचही आरोपींना विशेष न्यायलयात हजर करण्यात आले. मात्र, तांत्रिक कारणांमुळे त्यांना जामीन मंजूर झाला असल्याची माहिती उपायुक्त प्रशांत स्वामी यांनी दिली. या घटनेनंतर परिसरात खळबळ उडाली आहे.