Ladki Bahin: लाडक्या बहिणींना मिळणार फक्त 500 रुपये; 8 लाख बहिणींच्या हफ्त्यात कपात

लाडक्या बहिणींच्या अर्जांची छाननी सुरु असतानाच लाडकीचं टेन्शन वाढवणारी माहिती समोर आली आहे. राज्यात 8 लाख लाडक्या बहिणींच्या हफ्त्यात कपात होणार आहे. आता महिन्याला हातात 1500 रुपयाऐवजी 500 रुपयेच पडतील. कारण अर्जांच्या छाननीत लाडकींना नमो शेतकरी योजनेंतर्गत 1 हजारांचा सन्माननिधी मिळत असल्याचं समोर आलंय. त्यामुळे लाडकीच्या दर महिन्याच्या हप्त्यात कपात केली जाणार आहे.

बहिणींना आता 500 रुपयेच

8 लाख महिलांनी 2 योजनांचा लाभ घेतल्याचं उघड

नमो शेतकरी योजनेंतर्गत 1 हजारांचा सन्माननिधी

नमो शेतकरी योजनेचा निधी मिळत असल्यानं हप्त्यात कपात

एप्रिलपासून 8 लाख बहिणींना 500 रुपये मिळणार

राज्यात 8 लाख लाडक्या बहिणींना 500 रुपये देण्याच्या निर्णयावरुन विरोधकांनी सरकारवर जोरदार हल्लाबोल केलाय..मतांची किंमत आता 500 वर आलीय उद्या ती शून्य होईल असा टोला ठाकरे गटानं लगावलाय. तर महिलांना 500 रुपये देणाऱ्या सरकारची कीव येतंय असा हल्लाबोल काँग्रेसने केलाय. दुसरीकडे सर्व लाभार्थ्यांना दिलेल्या वचनानुसार निधी मिळणार असल्याचा दावा अर्थराज्यमंत्र्यांनी केलाय.

महायुती सरकार सत्तेवर आल्यानंतर लाडक्या बहिणींच्या अर्जांची काटेकोरपणे पडताळणी केली जात आहे. नवीन वर्षाच्या पहिल्या तिमाहितच सुमारे १५ लाख बहिणींना अपात्र ठरवण्यात आलंय. आगामी महिन्यात ही संख्या आणखी कितीवर जाणार हे पाहणं महत्वाचं आहे.