Ambadas Danve News : महाविकास आघाडीची सभा न भूतो न भविष्यति अशीच होणार; अंबादास दानवेंनी व्यक्त केला विश्वास

Chhatrapati Sambhaji Nagar: 2 एप्रिल रोजी छत्रपती संभाजीनगरमध्ये महाविकास आघाडीची सभा होणार आहे. या सभेच्या तयारीला आजपासून सुरुवात करण्यात आली आहे. शहरातील मराठवाडा सांस्कृतिक क्रीडा मंडळाच्या मैदानावर ही सभा होणार आहे.आज ठाकरे गटाचे नेते चंद्रकांत खैरे आणि विधान परिषदेचे विरोधी पक्षनेते अंबादास दानवे यांच्या हस्ते याच मैदानावर स्तंभ पूजन करण्यात आलं. (Latest Marathi News)

दरम्यान, या सभेला मैदानही कमी पडेल असा विश्वास खैरे यांनी व्यक्त केलाय. विरोधक 5 तारखेला धनुष्यबाण घेऊन अयोध्येला जाणार असले तरी ते किती दिवस धनुष्यबाण अयोध्येला घेऊन जातील, असा टोला त्यांनी लावला.

एकनाथ शिंदे हे 9 तारखेला छत्रपती संभाजीनगरला येणार असले तरी ते या मैदानावर येणार नाही, इथे येण्यासाठी त्यांच्यात दम नाही. ते शहरात येऊन गल्ली बोळात फिरतील असा टोला अंबादास दानवे यांनी मुख्यमंत्र्यांना लावलाय. महाविकास आघाडीची सभा न भूतो ना भविष्यति अशीच होणार, असं देखील अंबादास दानवेंनी ठामपणे सांगितलं आहे.

तसेच पुढे विरोधकांनी सुषमा अंधारे यांच्याबद्दल केलेल्या वक्तव्यावर देखील अंबादास दानवेंनी प्रतिकिया दिली आहे. यावेळी ते म्हणाले की, " विरोधक अगदी खालच्या पातळीवर बोलले आहेत. विरोधकांची पातळी अशीच आहे अशी टीका त्यांनी संजय शिरसाट यांच्यावर केली.

काय म्हणाले होते संजय शिरसाट?

संजय शिरसाट यांनी दावा केला की, ठाकरे गटानेच नेते आणि विधानपरिषदेचे विरोधी पक्षनेते अंबादास दानवे यांनी सुषमा अंधारे यांच्याबाबत आपल्याकडे नाराजी व्यक्त केली आहे. संजय शिरसाट म्हणाले की, अंबादास दानवे यांनी मला फोन केला. म्हणे ती बाई (सुषमा अंधारे) डोक्याच्या वर झाली आहे.

संजय शिरसाट यांची सुषमा अंधारेंवर टीका करताना जीभ घसरली. ती बाई सर्वांना म्हणते हे माझे भाऊ आहेत. सत्तार माझे भाऊ, भुमरे माझे भाऊ, काय काय लफडे केले तिने काय माहित,असं संयज शिरसाट यांनी म्हटलं. त्यावर आता अंबादास दानवेंनी पुन्हा एकदा संजय शिरसाट यांच्यावर जोरदार टीकास्त्र सोडलं आहे.

" माझा कोणाशीही काही संपर्क नाही. सध्या सर्वच गद्दार लोक अस्वस्थ झाले आहेत. वेगवेगळ्या पद्धतीने ते देखील संपर्कात असतात, मात्र आम्ही असा कोणताही दावा करत नाही. असं दानवेंनी म्हटलं आहे.