उन्हाळ्यात अर्ध्या महाराष्ट्राला पावसाचा तडाखा; उद्याच्या हवामानाच्या अंदाजानं टेन्शन वाढलं, कोणकोणत्या जिल्ह्यांना अलर्ट?

महाराष्ट्राला अवकाळी पावसाने झोडपलं आहे. राज्यातील विविध जिल्ह्यात ढगाळ वातावरणानंतर पावसाच्या सरी सुरू झाल्या. अवकाळी पावसाच्या तडाख्याने शेतकऱ्यांचं अतोनात नुकसान होण्याची शक्यता आहे. दुसरीकडे पुण्यासह राज्यातील अनेक जिल्ह्यात पुढील ४ दिवसांसाठी अवकाळी पावसाची शक्यता वर्तवण्यात आली आहे. हवामान विभागाच्या इशाऱ्यामुळे शेतकऱ्यांचं टेन्शन वाढलं आहे.

अवकाळी पावसाचा इशारा

हवामान विभागाने आज राज्यातील काही भागात गारपीट आणि अवकाळीचा अंदाज दिला होता. यात नाशिक, अहिल्यानगर, सोलापूर, बीड, लातूर, धाराशिव, कोल्हापूर आणि सांगलीत वादळी पावसाची शक्यता व्यक्त करण्यात आली होती.

पुणे, सातारा, जळगाव, छत्रपती संभाजीनगर, नांदेड,धुळे, बुलढाणा, परभणी, चंद्रपूर, अकोला, गडचिरोली, यवतमाळ, हिंगोली जिल्ह्यात अवकाळी पावसाची शक्यता व्यक्त करण्यात आली होती.

उद्या मंगळवारी पुणे, सातारा, छत्रपती संभाजीनगर, जालना, सांगली, सोलापूर, बीड, अहिल्यागर, नाशिक, जळगाव, परभणी आणि हिंगोलीत गारपीटीचा अंदाज वर्तवण्यात देण्यात आलाय. तर विदर्भातील नागपूर, वर्धा, यवतमाळ, भंडारा, गोंदिया, चंद्रपूर, धाराशिव, नांदेड, कोल्हापूर, सिंधुदूर्ग, रत्नागिरी, रायगड, गडचिरोली, लातूर आणि ठाणे जिल्ह्यात वादळी पावसाचा अंदाज व्यक्त करण्यात आला आहे.

अवकाळीमुळे शेतकऱ्यांचं नुकसान होणार

पुण्यातील पश्चिम भागात अवकाळी पाऊस झाला. पुण्यातील औंध, बालेवाडी, म्हाळुंगे या भागात पाऊस सुरू आहे. तर जळगावमध्ये अचानक सुरू झालेल्या पावसाने केळी पिकाचे काही प्रमाणात नुकसान होण्याची भीती व्यक्त करण्यात आली आहे. मात्र, अवकाळीने जळगावकरांना उकाड्यापासून दिलासा मिळाला आहे.

पुण्याच्या जुन्नर तालुक्यातील प्रसिद्ध शिवनेरी हापूस आंबा पिकाला मोठा फटका बसण्याची शक्यता व्यक्त करण्यात येत आहे. त्याचबरोबर भाजीपाला, कांदा, बटाटा आणि इतर पिकांचेही मोठ्या प्रमाणात नुकसान होण्याची भीती व्यक्त करण्यात आलीये. अचानक आलेल्या या नैसर्गिक आपत्तीमुळे शेतकरी हवालदिल झालेत.