Assembly Election: महायुतीचा मुख्यमंत्रिपदाचा चेहरा कोण? महायुती चेहऱ्याविना लढणार?

भरत मोहळकर, साम प्रतिनिधी

एकीकडे अजित पवार (Ajit Pawar) यांनी मुख्यमंत्रिपदाचा उल्लेख असलेला केक कापलाय. तर दुसरीकडे विधानसभेसाठी महायुतीचा मुख्यमंत्री पदाचा चेहरा कोण असणार? विधानसभेसाठी भाजपची रणनीती काय? यावर महायुतीत चर्चा सुरूच आहे.. मात्र याच प्रश्नाचं उत्तर थेट उपमुख्यमंत्री देवेंद्र फडणवीसांनी भाजपच्या अधिवेशनात दिलंय. त्यावरचा हा खास रिपोर्ट.

विधानपरिषद निवडणूकीतील विजयानंतर आत्मविश्वास वाढलेल्या महायुतीने विधानसभा (Vidhan Sabha) निवडणूकांसाठी कंबर कसलीय. त्यातच भाजपने पुण्यात, शिंदे गटाने ठाण्यात तर अजित पवार गटाने वेगवेगळे मेळावे घेत जोरदार शक्तीप्रदर्शन केलंय. मात्र पुण्यातील भाजपच्या अधिवेशनात उपमुख्यमंत्री देवेंद्र फडणवीसांनी विधानसभेसाठी विशिष्ट चेहरा पुढे करणार नसल्याचे सांगत चेहऱ्याविनाच निवडणुका लढण्याचे संकेत दिले आहेत.

विधानसभेसाठी महायुतीचा (Mahayuti) चेहरा कोण? याची सातत्याने चर्चा होत असते. त्यातच काही महिन्यांपुर्वी एकनाथ शिंदे हेच विधानसभेसाठी चेहरा असतील, असंही भाजपकडून जाहीर करण्यात आलं होतं. मात्र लोकसभेनंतर भाजपचे सूर हळुहळू बदलायला लागले आहेत. त्यातच विधानपरिषदेच्या विजयानंतर विधानसभा निवडणूका एकनाथ शिंदेंच्या नाही तर मोदींच्या नेतृत्वात लढण्याचे संकेत भाजपने दिले होते.

लोकसभा निवडणूक एकनाथ शिंदे यांच्या नेतृत्वात लढल्यानंतर पदरी पडलेल्या पराभवामुळे भाजप सावध झालाय. त्यातच आता भाजपने विधानसभेची रणनीती स्पष्ट केलीय. त्यामुळे भाजपची नवी रणनीती शिंदे गट आणि अजित पवारांच्या राष्ट्रवादीला मान्य होणार का? आणि भाजपची रणनीती यशस्वी ठरणार का? हे विधानसभेच्या निवडणूकीच्या निकालानंतरच स्पष्ट होणार आहे.