Maharashtra Politics: शिवसेना पुन्हा फुटणार? शिंदे गटातील नेते भाजपात जाणार; संजय राऊतांचा दावा

महाराष्ट्रातील राजकारणात पुन्हा एकदा भूकंप होणार? पुन्हा एकदा शिवसेनेत फूट पडणार? हे प्रश्न उपस्थित करत आहोत ते संजय राऊतांनी केलेल्या दाव्यामुळे. उपमुख्यमंत्री एकनाथ शिंदे यांच्या नाराजीवरून बोलतांना संजय राऊत यांनी राजकीय भूकंपाचा दावा केलाय. एकनाथ शिंदे यांचा स्वतःचा पक्ष नाही, तर अमित शहा यांनी त्यांना तो पक्ष दिलाय. त्यामुळे तो त्यांचा पक्ष नाहीये. त्यांचा पक्ष एकसंघ राहील की नाही याबाबत शंका असून पुढील काळात त्यातील अनेकजण भाजपमध्ये जातील, असा दावा राऊतांनी केलाय.

त्यांच्या विधानाने पुन्हा एकदा शिवसेना फुटीची चर्चेने जोर धरलाय. विधानसभा निवडणुकीत महायुतीला मोठं यश मिळालं होतं. मात्र मुख्यमंत्रिपद आणि त्यानंतर खातेवाटप आणि आता पालकमंत्रिपदावरून महायुतीत वाद दिसून येत आहे. राज्य कारभाराचा निर्णय घेताना भाजप एकनाथ शिंदेंना दूर ठेवत आहे. पालकमंत्रिपद आणि मंत्रिपदावेळी एकनाथ शिंदेंनी नाराज व्यक्त केली होती. नेहमी, नेहमी डावललं जात असल्याने शिंदे गटातील आमदारांमध्ये नाराजीचं वातावरण आहे.

भाजप शिंदेंना दूर करत उदय सामंत यांना पुढे करत आहे, त्यांना उपमुख्यमंत्री केलं जाणार असल्याची चर्चा सुद्धा राजकीय वर्तुळात होती. काँग्रेस नेते विजय वडेवट्टीवार यांनी सुद्धा त्याबाबत विधान केलं होतं. त्यांच्या विधानामुळे शिंदे गटात फूट पडणार असल्याची चर्चा सुरू झाली होती. पण वडेवट्टीवार यांचा दावा सामंत यांनी फेटाळून लावलं होतं.

संजय राऊतांच्या विधानामुळे शिंदे गटातील फुटीवरच्या चर्चेला आता परत एकदा पेव फुटले आहे. काही दिवसांपासून महायुतीत काही आलबेल नसल्याची चर्चा आहे. त्यातच राज्यातील विधानसभा निवडणुकीच्या निकालापासून एकनाथ शिंदे नाराज आहेत. अनेकदा त्यांची नाराजी दिसून आलीय. त्याच दरम्यान उपमुख्यमंत्री एकनाथ शिंदे आणि त्यांच्या नेत्यांचे फोन दिल्लीतून टॅप केले जात असल्याची बातमी समोर आली.

आता ठाकरे गटाचे खासदार संजय राऊत यांनी शिवसेनेत आमदार भाजपमध्ये जाणार असल्याचा खळबळजनक दावा केलाय. मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्यात विसंवाद असल्याचं दिसून येत आहे. त्यामुळे सरकारकडे मोठे बहुमत असूनही राज्य अस्थिर असल्याचं राऊत म्हणाले.