आधी मनसे, नंतर राष्ट्रवादी आणि आता शिवसेना? रूपाली ठोंबरेंच्या शिंदे भेटीनं राजकीय चर्चांना उधाण

राष्ट्रवादी अजित पवार गटाच्या महिला नेत्या रूपाली ठोंबरे पाटील यांनी आज उपमुख्यमंत्री एकनाथ शिंदे यांचे सुपुत्र खासदार श्रीकांत शिंदे यांची भेट घेतली आहे. काही दिवसंपूर्वीच रूपाली पाटील यांनी त्यांच्याच पक्षातील राज्य महिला आयोगाच्या अध्यक्षा रूपाली चाकणकर यांच्यावर गंभीर आरोप करत मोठे आंदोलन केले होते. तसेच चाकणकरांवर हल्लाबोल केला होता. यावरूनच पक्षाने त्यांना कारणे दाखवा नोटिस ही बजावल्याचा फोटोही व्हायरल झाला होता.

त्यानंतर रूपाली पाटील यांनी उपमुख्यमंत्री अजित पवार यांची भेट घेतली होती. मात्र दोघांची भेट झाल्यानंतर दोन दिवसात त्यांना पक्षाच्या प्रवक्तापदावरून काढले गेले. त्यानंतर त्या नाराज असल्याच्या चर्चा सुरू होत्या. या सगळ्या नाराजी नात्यानंतर रूपाली पाटील यांनी श्रीकांत शिंदे यांनी मुंबईमध्ये भेट घेतली आहे. विशेष म्हणजे रूपाली पाटील यांच्यासोबत कॉँग्रेसच्या संगीता तिवारी आणि शिंदे गटाच्या शर्मिष्ठा येवले यादेखील उपस्थित होत्या.

सुरुवातीला रूपाली पाटील मनसे पक्षामध्ये होत्या. राज ठाकरे यांच्या कट्टर कार्यकर्त्या मानल्या जात असे. मात्र पक्षातील अंतर्गत कलहामुळे त्यांनी मनसेतून राष्ट्रवादीमध्ये प्रवेश केला. या पक्षात ही त्यांचे अंतर्गत वाद पाहायला मिळत आहे. त्यामुळे रूपाली ठोंबरे पाटील लवकरच शिंदे यांच्या शिवसेनेते प्रवेश करणार असल्याची शक्यता व्यक्त केली जात आहे. त्यामुळे रूपाली ठोंबरे पाटील लवकरच शिंदे यांच्या शिवसेनेते प्रवेश करणार असल्याची शक्यता व्यक्त केली जात आहे.

रूपाली ठोंबरे पाटील यांचे भेटीनंतर स्पष्टीकरण

खासदार डॉ. श्रीकांत शिंदे यांची माझी भेट ही पूर्णपणे कामानिमित्त झाली होती. मला शिवसेना शिंदे गट किंवा इतर कोणत्याही पक्षाकडून सध्या कोणतीही ऑफर आलेली नाही. मात्र काम करणाऱ्या आणि प्रामाणिक कार्यकर्त्याला जर कधी ऑफर मिळाली, तर त्यावर विचार करण्यास हरकत नाही. ही भेट ही फक्त महा‌यूतीतील मित्रपक्षाचे खासदार म्हणून झाली होती. म्हणून, डॉ. श्रीकांत शिंदे यांची भेट घेतली यामागे दुसरा कोणताही राजकीय अर्थ काढू नये. असे रूपाली ठोंबरे पाटील यांनी सांगितले.