Chhatrapati Shivaji Maharaj Statue: सरकारने स्वतः माफी मागून पायउतार व्हावे, मालवणच्या घटनेनंतर काँग्रेसची मागणी

Nana Patole On Chhatrapati Shivaji Maharaj Statue: सिंधुदुर्गच्या मालवणमधील राजकोट किल्ल्यावर पीएम नरेंद्र मोदींच्या हस्ते अनावरण करण्यात आलेला छत्रपती शिवाजी महाराजांचा पुतळा सोमवारी कोसळला. या घटनेमुळे राज्यभरात संताप व्यक्त केला जात. या घटनेवरून राजकारण देखील चांगलेच तापले आहे. विरोधकांनी राज्य सरकारसोबतच केंद्र सरकारवर टीका केली आहे. आता काँग्रेसचे नेते नाना पटोले यांनी या घटनेवरून राज्य सरकारसोबत मोदी सरकारवर देखील जोरदार निशाणा साधला आहे. 'मोदी ज्याला हात लावतात तेच खराब होत आहे.', अशा शब्दात नाना पटोले यांनी टीका केली.

नाना पटोले यांनी माध्यमांशी संवाद साधताना सांगितले की, 'ही लोकं छत्रपती शिवाजी महाराज यांचा सतत अपमान करत आले आहेत. हे सरकार कमिशन खोर आहे. छत्रपती शिवाजी महाराज यांच्या विचारांचं सरकार नाही. १ रुपयांची वस्तू १० रुपयांत विकत घेतली जाते. मूर्तिकार यांना अनुभव नसताना सुध्दा त्यांना मूर्तीचे काम दिलं. २३६ कोटी मूर्ती बनवायला आणि ५ कोटी रुपये सौंदर्य करायला खर्च केला आहे. राज्य सरकार म्हणते की आमचा दोष नाही केंद्र सरकारचा दोष आहे.'

तसंच, 'पीएम मोदी तर छत्रपतींचा अपमान करायला उठले आहे. छत्रपती शिवाजी महाराज यांचा अपमान भाजपा करत आहे. राज्य सरकारवर एफआयआर दाखल करण्यासाठी डीजीपींना पत्र देणार आहे. मोदी ज्याला हात लावतात तेच खराब होत आहे. अधिकारी किंवा कंत्राटदार यांचा‌ दोष नसून राज्य सरकारच दोषी आहे. सरकारने स्वतः माफी मागून पायउतार व्हावे.', अशी मागणी नाना पटोले यांनी केली आहे.

राज्यातील महिला आत्याचारावर देखील नाना पटोले यांनी प्रतिक्रिया दिली. त्यांनी सांगितले की, 'राज्यात महिला सुरक्षित नाहीत. गुन्हेगारांवर लगाम नाही. बदलापूरमध्ये घटना झाली त्यामध्ये आरोपीला वाचविण्याचा प्रयत्न करत होते. पोलिस बघ्याच्या भूमिकेत आहे. गुंड लोकांना वाय प्लस सुरक्षा दिली आहे.', असे म्हणत नाना पटोले यांनी राज्य सरकारवर संताप व्यक्त केला आहे.