भाजपविरोधात भूमिका घेतली, नेत्याची थेट पक्षातूनच हकालपट्टी, ६ वर्षांसाठी निलंबित

राजकीय वर्तुळातून हादरवणारी बातमी समोर येत आहे. पक्षविरोधी भुमिका घेणारे नागपूर जिल्ह्यातील भाजप नेते प्रकाश टेकाडे यांची पक्षातून हकालपट्टी करण्यात आली आहे. नागपूर ग्रामीणचे जिल्हाध्यक्ष मनोहर कुंभारे यांनी टेकाडे यांना ६ वर्षांसाठी निलंबित केलं असल्याची माहिती आहे. आगामी स्थानिक स्वराज्य संस्था निवडणुकीच्या तोंडावर कारवाई केल्यानं चर्चेला उधाण आलं आहे.

नागपूर ग्रामीणचे जिल्हाध्यक्ष मनोहर कुंभारे यांनी ६ वर्षांसाठी प्रकाश टेकाडे यांना निलंबित केलं आहे. पक्षविरोधी भुमिका घेतल्यामुळे त्यांच्यावर कारवाई केली असल्याची माहिती आहे. विधानसभा निवडणुकीदरम्यान, टेकाडे यांनी सोशल मीडियाद्वारे पक्षविरोधी भुमिका घेतली होती. या कारणावरून त्यांच्यावर कारवाई करण्यात आली आहे.

गेल्या वर्षी लोकसभा निवडणुकीच्या तोंडावर मनोहर कुंभारे यांनी काँग्रेसला सोडचिठ्ठी देत भाजप पक्षात प्रवेश केला. दरम्यान, याला प्रकाश टेकाडे यांचा विरोध होता. मनोहर कुंभारे यांच्या विरोधात टेकाडे यांनी जिल्हा परिषदेची निवडणूक लढवली होती. दरम्यान, त्यानंतर मनोहर कुंभारे यांना भाजपचे जिल्हाध्यक्ष बनवण्यात आले.

कुंभारे यांना जिल्हाध्यक्ष बनवण्यात आल्यामुळे टेकाडे काही काळ अस्वस्थ होते. गेल्या आठ महिन्यांपासून ते सतत पक्षाच्या बैठकांना गैरहजर राहत असल्याची माहिती आहे. मात्र, आता पक्षविरोधी भूमिका घेतल्यामुळे त्यांची थेट पक्षातून हकालपट्टी करण्यात आली आहे. कुंभारे यांनीच त्यांना ६ वर्षांसाठी निलंबित केलं आहे.