Maharashtra Politics : उद्धव ठाकरेंना मोठा धक्का बसणार? मोठ्या पदावरील युवा नेता महायुतीच्या वाटेवर

Maharashtra : स्थानिक स्वराज्य संस्थांच्या निवडणुकीच्या पार्श्वभूमीवर पक्षांमध्ये इनकमिंग आणि आउटगोईंग सुरु असल्याचे पाहायला मिळत आहे. निवडणुकींच्या आधी रत्नागिरीतील दापोली, खेड मतदारसंघात राजकीय उलथापालथ सुरु असल्याचे म्हटले जात आहे. खेडचे माजी नगराध्यक्ष वैभव खेडेकर दुसऱ्या पक्षात जाणार असल्याची चर्चा सुरु असताना मनसेने त्यांना निलंबित केले. ते आता भाजपमध्ये प्रवेश करणार आहेत. राज ठाकरे यांच्यानंतर आता उद्धव ठाकरेंच्या पक्षातील युवा नेता महायुतीच्या वाटेवर असल्याची चर्चा सुरु आहे.

सूत्रांकडून मिळालेल्या माहितीनुसार, दापोली, खंड, मंडणगड विधानसभा मतदारसंघातील शिवसेना ठाकरे गटातील युवा नेता हा महायुतीच्या वाटेवर असल्याची चर्चा सुरु आहे. उपमुख्यमंत्री एकनाथ शिंदे यांचा शिंदे गट आणि भारतीय जनता पक्षातील पदाधिकाऱ्यांशी या युवा नेत्याच्या भेटीगाठी सुरु असल्याचे बोलले जात आहे.

ठाकरे गटाचे माजी आमदार संजय कदम यांनी शिंदे गटात प्रवेश केला. संजय कदम यांच्या प्रवेशानंतर दापोली नगर पंचायतीतील नगरसेवकांनीही शिवसेना शिंदे गटात प्रवेश केला. ठाकरे गटाच्या माजी नगराध्यक्ष ममता गोरे यांनी राष्ट्रवादी अजित पवार गटाचे प्रदेशाध्यक्ष सुनील तटकरे, शिवसेनेचे अनिल परब यांचा फोटो वाढदिवसाला सोशल मीडियावर टाकला होता. एकूणच ठाकरे गटातून कोकणात आउटगोईंग सुरु असल्याचे म्हटले जात आहे.

दापोलीमधील शिवसेना ठाकरे गटाचा युवा नेता पक्षामध्ये अस्वस्थ असल्याची चर्चा रंगली आहे. शिवसेना शिंदे गटातील काही नेत्यांसोबत या युवा नेत्याने गुप्त बैठका घेतल्याचेही म्हटले जात आहे. याआधी भाजपमधील काही नेत्यांसह, पदाधिकाऱ्यांसह युवा नेत्याने भेटीगाठी केल्या आहेत. हा युवा नेता ठाकरे गट सोडून महायुतीत जाणार असल्याची चर्चा सुरु आहे.