Maharashtra Politics : संजय राऊत घरकोंबडा, शरद पवार राजकारणात आग लावतात; सदाभाऊ खोत भडकले

Sadabhau Khot on Sanjay Raut and Sharad Pawar : सांगली : संजय राऊत घरकोंबडा आहे, रोज आरोळी देतो, असा टोला सदाभाऊ खोत यांनी लगावला. महाविकास आघाडीच्या नेत्यांनी मराठा समाजाला पाठिंबा आहे, असे पत्र द्यावे. महाराष्ट्रामध्ये आग लावण्याचे काम बंद करावे. येणाऱ्या निवडणुकीत महाविकास आघाडीतील वळू रेड्यानं चाबकाने फोडून काढणार, असं वक्तव्य सदाभाऊ खोत यांनी केलेय. ते सांगलीच्या शिराळा येथील रयत क्रांती कार्यालयाचे उद्घाटन प्रसंगी बोलत होते.

संजय राऊतांवर टीकास्त्र -

संजय राऊत नावाचा घरकोंबडा रोज एक आरोळी देतो. रोज भांग देऊ नकोस खुरुड्यातनं, असे त्या कोंबड्याला मी सांगत आहे, असा टोला खोत यांनी लगावला.

तू एक पत्र लिहून दे जरांगे पाटलांना माझी उबाठा सेना मराठा समाजाला ओबीसीमध्ये समाविष्ट करायला पाठिंबा देत आहे. तुझ्यात जोर आहे का, हे पाहयूता, असे वक्तव्य आमदार सदाभाऊ खोत यांनी केले.

शरद पवार आग लावण्याच काम करतात -

तसेच महाराष्ट्रामध्ये राजकारणात आग लावण्याचे काम शरद पवार करत आहेत, हे वेळीच मराठा समाजाने ओळखलं पाहिजे. सगळं दिल्यानंतर या राज्यांमध्ये मराठा समाजामध्ये धुई माजवण्याचे काम करत आहेत. मी अनेक वेळा वक्तव्य केले जी माणसं महाविकास आघाडीची निवडून आली, त्यांनी एक पत्र लिहावं सरकारला. एक पत्र लिहावं जरांगे पाटलांना मी खासदार अमुक.. अमुक लिहून देतो की मराठा समाजाला ओबीसीमध्ये समावेश करायला माझा पाठिंबा आहे.

रोहित पवार विद्वान माणूस आहे, आग लावत तुम्ही महाराष्ट्रात सुटलाय. भाडोत्री सोशल मीडिया महाराष्ट्रात तुम्ही ठेवलीय. मराठा समाज ओबीसीमध्ये समावेश करायला पाठिंबा असल्याचं रोहित पवारांनी लिहून द्यावे. नाहीतर हे आग लावायचे धंदे या महाराष्ट्रातून बंद करा. लोकसभेला जमलं म्हणून आता जमल ही भावना काढून टाका, अशी कडाडून टीका सदाभाऊ खोत यांनी केली.

महायुतीचे सरकार सत्तेत आल्यावर अनेक चांगले निर्णय घेतले. अनेक योजना आणल्या. पण महाविकास आघाडीचे नेते टीका करतात. पण येणाऱ्या निवडणुकीत या महाविकास आघाडीतील वळू रेड्यानं चाबकाने फोडून काढू अशी टीका ही खोत यांनी केली.