पुण्यानंतर मुंबईजवळ जमीन घोटाळा?
राज्याचे मंत्री प्रताप सरनाईक यांच्यावर आरोप
विजय वडेट्टीवारांच्या आरोपांवर सरनाईकांचे स्पष्टीकरण
गेल्या काही दिवसांपासून महाराष्ट्रात जमीन घोटाळ्यांच्या आरोपांनी राळ उडवून दिली आहे. पुण्यातील जमीन घोटाळ्याचं प्रकरण ताजं असतानाच महायुती सरकारमधील एका मंत्र्यांवरही आता जमीन घोटाळ्याचा आरोप झाला आहे. शिंदेंच्या शिवसेनेचे नेते आणि परिवहन मंत्री यांच्यावर हा आरोप करण्यात आला आहे.
प्रताप सरनाईक यांनी जमीन घोटाळा केल्याचा आरोप काँग्रेस नेते विजय वडेट्टीवार यांनी केला आहे. सरनाईक यांनी मीरा भाईंदरमधील दोनशे कोटींची चार एकर जागा अवघ्या तीन कोटींना खरेदी केल्याचा आरोप त्यांनी केला आहे. शैक्षणिक संस्थेच्या नावावर ही जमीन ला़टली असल्याचं ते म्हणाले. या प्रकरणी सखोल चौकशी करण्यात यावी, अशी मागणीही त्यांनी केली आहे.
राज्याचे माजी विरोधी पक्षनेते विजय वडेट्टीवार यांनी मंत्री प्रताप सरनाईक यांच्यावर जमीन घोटाळ्याचा आरोप केला आहे. सरनाईक यांनी स्वतःच्या शैक्षणिक संस्थेच्या नावाने मीरा भाईंदरमधील मोक्याच्या ठिकाणची चार एकर जमीन आहे, तिची किंमत बाजारभावानुसार २०० कोटी रुपये आहे. ती अवघ्या ३ कोटी रुपयांना खरेदी केली, असा आरोप वडेट्टीवार यांनी केला.
मंत्र्यांना स्वतःच्या शैक्षणिक संस्थेच्या नावाने अशा प्रकारे चॅरिटीच्या नावाखाली जमीन घेता येते का? आणि हे जर होऊ शकते तर महाराष्ट्र लुटून खा. आम्ही डोळे बंद करून बसतो. या लुटा आणि महाराष्ट्र विका, असा संतापही त्यांनी व्यक्त केला. या प्रकरणी सखोल चौकशी करण्याची मागणीही त्यांनी केली.
विजय वडेट्टीवारांच्या आरोपांवर प्रताप सरनाईक यांनी उत्तर दिलं आहे. वडेट्टीवार हे फार मोठे नेते आहेत. ते विरोधी पक्षनेते होते. मी या राज्याचा जबाबदार मंत्री आहे. शिवसेनेचा नेता आहे. त्यांनी काही आरोप करत असताना कागदोपत्री पुरावा दाखवला पाहिजे. मंत्री आहे म्हटल्यावर आरोप हे होतच असतात. मी सुद्धा कालपासून शोधतोय की ही २०० कोटींची माझी मालमत्ता आहे तरी कुठे? आणि मी ती जमीन फक्त तीन कोटींमध्ये घेतली असेल तर मी सुद्धा शोधाशोध करतोय, असं सरनाईक म्हणाले.
वडेट्टीवार यांनी सरनाईक यांच्यावर केलेल्या जमीन घोटाळ्याच्या आरोपांवर महसूल मंत्री चंद्रशेखर बावनकुळे यांनी प्रतिक्रिया दिली आहे. वडेट्टीवार कोणत्या प्रकरणावर बोलत आहेत, त्याची चौकशी करावी लागेल. त्यांनी माझ्याकडे तक्रार द्यावी. हे लोक केवळ मीडियात बोलतात. तक्रार दिली पाहिजे. तर चौकशी होईल. पुण्यातही असंच प्रकरण होतं. माध्यमांकडून दाखवण्यात आल्यानंतर आम्ही स्वतःहून दखल घेतली. त्यावर आम्ही कारवाई केली, असे बावनकुळे म्हणाले.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.