Ladki Bahin Yojana : लाडकीला खूशखबर! एप्रिलचे ₹१५०० कधी येणार? आदिती तटकरेंनी तारीख सांगितली

Aditi Tatkare Ladki Bahin yojana update : महाराष्ट्र सरकारच्या महत्वाकांक्षी ‘मुख्यमंत्री माझी लाडकी बहीण’ योजनेच्या लाभार्थ्यी महिलांसाठी आनंदाची बातमी आहे. एप्रिल महिन्याचा हप्ता पुढील दोन ते तीन दिवसांत लाडक्या बहि‍णींच्या खात्यावर जमा होणार आहे. राज्याच्या महिला व बालविकास मंत्री आदिती तटकरे यांनी याबाबत माहिती दिली आहे. आदिती तटकरे यांनी एक्सवर पोस्ट करत एप्रिल महिन्याचा हप्ता येणार असल्याचे सांगितले. आदिती तटकरेंनी आपल्या पोस्टमध्ये म्हटले की, लाडकी बहीण योजनेचा एप्रिल महिन्याचा हप्ता येत्या दोन ते तीन दिवसांत लाभार्थ्यांच्या बँक खात्यात जमा होईल.

लाडक्या बहिणी एप्रिल महिन्याच्या हप्त्याकडे डोळे लावून बसल्या आहेत. अदिती तटकरे यांनी अक्षय्य तृतीयेला बहि‍णींच्या खात्यात एप्रिलचे १५०० रूपये जमा होतील, असे सांगितले होते. पण तांत्रिक अडचणीमुळे हा हप्ता वेळेवर लाडकीच्या खात्यात जमा झाला नाही. यासंदर्भात अदिती तटकरेंनी आता नवी माहिती दिली आहे. त्या म्हणाल्या, 'येत्या २ ते ३ दिवसांत खात्यात पैसे जमा होण्यास सुरुवात होईल.'

‘मुख्यमंत्री माझी लाडकी बहीण’ योजना महाराष्ट्रातील २१ ते ६५ वयोगटातील पात्र महिलांना दरमहा १,५०० रुपये आर्थिक मदत प्रदान करते. महिलांना स्वावलंबी आणि सक्षम बनवणे हा योजनेचा उद्देश आहे. आतापर्यंत या योजनेला राज्यभरातून प्रचंड प्रतिसाद मिळाला. कोट्यवधी महिलांनी आतापर्यंत या योजनेचा लाभ घेतलाय. एप्रिलचा हप्ता वेळेत जमा होण्याची अपेक्षा असताना काही तांत्रिक कारणांमुळे विलंब झाल्याची चर्चा होती. मात्र, तटकरे यांच्या या पोस्टमुळे लाभार्थ्यांमधील संभ्रम दूर झाला आहे.