Maharashtra ATS Raid : भट्टी गँग ATS च्या रडारावर; नाशिक, नागपूरसह ९ जिल्ह्यात छापेमारी, पाकिस्तान कनेक्शन आले समोर

पराग ढोबळे, नागपूर

महाराष्ट्रात दहशतवादविरोधी पथक (ATS) कडून मोठ्या प्रमाणावर कारवाई सुरू असून राज्यातील विविध जिल्ह्यांत एकाच वेळी छापेमारी करण्यात येत आहे. पाकिस्तानी गँगस्टर शहजाद भट्टी याच्या टोळीशी संबंधित संशयितांवर नजर ठेवत एटीएसने ही मोहीम हाती घेतल्याची माहिती समोर येत आहे. या पार्श्वभूमीवर अकोला जिल्ह्यातून एका संशयित व्यक्तीला चौकशीसाठी ताब्यात घेण्यात आल्याची माहिती सूत्रांकडून मिळत आहे.

ताब्यात घेण्यात आलेली व्यक्ती वाशिम जिल्ह्यातील रहिवासी असल्याची प्राथमिक माहिती असून, आज सकाळी अकोल्यातून त्याला एटीएसने ताब्यात घेतले. राज्यभरात सुरू असलेल्या या ऑपरेशनमुळे सुरक्षा यंत्रणा सतर्क झाल्या असून संबंधित संशयितांवर बारकाईने नजर ठेवली जात आहे.

नालासोपारा, नागपूर, पुणे, मुंबई, नांदेड, नाशिक, अकोला, वाशिम आणि जळगाव या ठिकाणी एटीएसकडून एकाच वेळी छापेमारी सुरू आहे. डोग्रा गँगच्या धर्तीवर काम करण्याचा प्रयत्न करणाऱ्या घटकांवरही लक्ष केंद्रित करण्यात आले आहे. या सर्व कारवाया अत्यंत गोपनीय पद्धतीने पार पाडल्या जात असून, संबंधित व्यक्तींची चौकशी सुरू आहे. दरम्यान, नाशिकमध्येही एटीएसची विशेष हालचाल पाहायला मिळत आहे.

जुने नाशिक परिसरात एटीएस पथकाकडून सर्च ऑपरेशन सुरू असल्याची माहिती आहे. पाकिस्तानी भट्टी गँगशी संबंधित काही संशयित या भागात वास्तव्यास असल्याचा संशय एटीएसला आहे. त्यामुळे काही संशयितांना चौकशीसाठी ताब्यात घेण्यात आले आहे. याचवेळी मुंबईतील एटीएसचे पथकही नाशिकमध्ये दाखल झाले असल्याची माहिती समोर आली आहे. त्यामुळे या कारवाईला अधिक वेग मिळण्याची शक्यता आहे. राज्यभर सुरू असलेल्या या मोठ्या ऑपरेशनमुळे गुन्हेगारी आणि दहशतवादी नेटवर्कवर मोठा आळा बसण्याची शक्यता वर्तवली जात आहे.