VIDEO: 'खिशात नाही आणा, बाजीराव म्हणा', अर्थसंकल्पावरुन विरोधक आक्रमक; विधानभवनाच्या पायऱ्यांवर आंदोलन

गिरीश कांबळे| मुंबई,ता. २९ जून २०२४

राज्याचे पावसाळी अधिवेशन सध्या सुरू आहे. काल शिंदे- फडणवीस सरकारकडून राज्याचा अंतरिम अर्थसंकल्प सादर केल्यानंतर आज विधानसभेत यावर चर्चा होण्याची शक्यता आहे. मात्र आजच्या कामकाजाला सुरूवात होण्यापूर्वीच विरोधक आक्रमक झाल्याचे पाहायला मिळाले. काल सादर झालेल्या अर्थसंकल्पावरुन विरोधकांनी राज्य सरकारविरोधात जोरदार घोषणाबाजी केली. यावेळी विरोधकांनी 'खिशात नाही आणा, बाजीराव म्हणा लुटारू सरकार हाय हाय, ४० टक्के कमिशन घेणाऱ्या सरकारचा धिक्कार असो, अशा घोषणा देत परिसर दणाणून सोडल्याचे पाहायला मिळाले.

विरोधक आक्रमक!

महायुती सरकारचा शेवटचा अर्थसंकल्प म्हणजे तिजोरीत खळखळाट अन् थापांचा सुळसुळाट, बजेटमधून विधानसभेच्या तयारीच्या येतोय वास या घोषणांनी आज विधानभवनाचा परिसर दणाणला. महाविकास आघाडीच्या नेत्यांनी विधानभवनाच्या पायऱ्यावर आज जोरदार निदर्शने करत महायुतीच्या अर्थसंकल्पाची पोलखोल केली.

अर्थसंकल्पावरुन जोरदार घोषणाबाजी

लोकसभा निवडणुकीचा घेतला धसका, विधानसभेला मस्का अशी महायुतीची अवस्था आहे. बजेटमध्ये मोठ्या घोषणांचा पाऊस पडला पण हा तर विधानसभा निवडणुकीसाठी युतीचा आटापिटा आहे यावरून महाविकास आघाडीने जोरदार आंदोलन केले. भाऊ म्हणून दाखवलं महिलांना योजनांचे भुल, महिलाच करतील निवडणुकीत गूल, निधीची वानवा आणि खैरातीचा गारवा अशा जोरदार घोषणा महाविकास आघाडीच्या नेत्यांनी दिल्या.

'खिशात नाही आण आणि मला बाजीराव म्हणा, लुटारू सरकार हाय हाय, 40 टक्के कमिशन घेणाऱ्या सरकारचा धिक्कार असो', या घोषणातून महाविकास आघाडीच्या नेत्यांनी अर्थसंकल्पाची पोलखोल केली. या घोषणांचे बॅनर सर्वांचे लक्ष वेधून घेत होते. दरम्यान, यावेळी शिंदे गटाच्या आमदारांनीही उद्धव ठाकरेंविरोधात घोषणाबाजी केली.