Maharashtra : नेत्याच्या मुलावर जीवघेणा हल्ला, समर्थकांनी हल्लेखोरांचे घर फोडले, कार जाळली

अक्षय गवळी, साम टीव्ही, प्रतिनिधी

Shocking News : अकोला येथून एक धक्कादायक बातमी समोर आली आहे. वंचित बहुजन आघाडीचे नेते राजेंद्र पातोडे यांच्या मुलावर एकाने हल्ला केला. या हल्ल्यात पातोडे यांचा मुलगा गंभीररित्या जखमी झाला. हल्ल्याची माहिती मिळताच राजेंद्र पातोडे यांच्या समर्थकांनी हल्ला करणाऱ्या व्यक्तीच्या घराची तोडफोड करत घराबाहेरील कार जाळली.

मिळालेल्या माहितीनुसार, वंचित बहुजन आघाडीचेa प्रदेश महासचिव आणि प्रवक्ता राजेंद्र पातोडे यांच्या मुलावर आज (५ ऑगस्ट) शेजारी राहणाऱ्या इंगोले कुटुंबातील एका सदस्याने हल्ला केला. या हल्ल्यामध्ये पातोडे यांचा मुलगा जखमी झाला असून त्याच्यावर शस्त्रक्रिया देखील झाली. हल्ल्यामुळे मुलगा गंभीर स्वरुपात जखमी झाल्याचे म्हटले जात आहे.

राजेंद्र पातोडे यांच्या समर्थकांनी आणि कार्यकर्त्यांनी इंगोले कुटुंबाच्या घरावर हल्ला चढवला. घराची आणि घराच्या आसपास असलेल्या वस्तूंची पातोडेंच्या समर्थकांनी तोडफोड केली. त्यानंतर कार्यकर्त्यांनी घराच्या अंगणात उभी असलेली कार पेटवून दिली. रागाच्या भरात पातोडे यांच्या कार्यकर्त्यांनी इंगोले कुटुंबाच्या घरावर हल्ला करुन त्यांचे नुकसान केल्याची प्राथमिक माहिती समोर आली आहे.

घराची तोडफोड करुन घरासमोरील कार जाळल्याची माहिती मिळताच अकोल्याचील खदान आणि स्थानिक गुन्हे शाखेचे पोलीस घटनास्थळी दाखल झाले. त्यांनी समर्थकांना, कार्यकर्त्यांना थांबवण्याचा प्रयत्न केला. हा संपूर्ण प्रकार अकोला शहरातील आदर्श कॉलनीमध्ये घडला आहे. या प्रकरणात खदान पोलिसांकडून गुन्हे दाखल करण्याची प्रक्रिया सुरू असून पुढील तपास सुरू आहे.