Nagpur News : बस अडवून खिडकीवर चढला, प्रवाशांना मारहाण; अर्धनग्न होत तरुणाचा भररस्त्यात राडा, शेवटी....

काही दिवसांपूर्वी मुंबईतील लोकल ट्रेनमध्ये महिलांच्या डब्ब्यात घुसून एका मनोरुग्णाने अश्लील वर्तन केले होते. अशीच एक डोक्यात तिडीक जाणारी घटना नागपूरमध्ये घडली आहे. नागपूर जिह्यातील सावनेर बसस्थानकावर अर्धनग्न अवस्थेत असलेल्या एका मनोरुग्णाने गुरुवारी प्रचंड गोंधळ घातला. बसच्या खिडक्यांवर आणि दरवाज्यावर लटकून त्याने अश्लील वर्तन केल्याचे समोर आले आहे. दरम्यान या युवकाला पोलिसांनी ताब्यात घेतले असून त्याच्यावर आरोग्य केंद्रात उपचार सुरु आहेत.

नेमकं काय घडलं ?

नागपूर जिल्ह्यातील सावनेर गावातील बस्थानकावर गुरुवारी दुपारच्या सुमारास एक मनोरुग्ण अर्धनग्न अवस्थेत फिरत होता. बस्थानकावर बस येताच त्याने बसच्या काचांवर उड्या मारत धिंगाणा घातला. तसेच प्रवाशांवर हल्ला देखील केला. त्यानंतर त्याने बसच्या दरवाजात उभे राहून अश्लील वर्तन केले. हा प्रकार जवळ जवळ ४५ मिनिटे असाच सुरु राहिल्याने बसमधील प्रवाशांमध्ये भीतीचे वातावरण निर्माण झाले होते.

या घटनेची माहिती मिळताच पोलिस तात्काळ घटनास्थळी दाखल झाले.४५ मिनिटांच्या थरारक प्रयत्नानंतर पोलिसांनी २८ वर्षीय मानसिक रुग्ण नीरजला ताब्यात घेतलं. हा युवक मध्यप्रदेशातील नरसिंहपूर येथील रहिवासी असल्याचे पोलीस तपासात समोर आले आहे.

पोलिसांनी नीरजला ताब्यात घेतल्यानंतर त्यांनी त्याला सावनेर प्राथमिक आरोग्य केंद्रात दाखल केले. सध्या त्याच्यावर मानसिक आरोग्य केंद्रात उपचार सुरू आहे. तसेच त्याच्या पालकांनाही याबाबतची माहिती देण्यात आली आहे. मात्र हा युवक मध्यप्रदेशातून नागपूरमध्ये कसा पोहचला? याचा तपास पोलीस करत आहेत.