Leopard Terror: हिंगोलीत बिबट्यामुळे चक्काजाम; शेतकऱ्यांची कामे बंद, विद्यार्थ्यांना सुट्ट्या

संदीप नागरे, साम प्रतिनिधी

संपूर्ण राज्यात बिबट-मानवी संघर्ष वाढलाय. मानवी वस्तीमध्ये बिबट्यांचा संचार वाढला आहे. दररोज बिबट्यांच्या हल्ल्या घटना घडत आहेत. हिंगोलीत तर बिबट्याच्या दहशतीनमुळे तेथील शेतकऱ्यांची कामे बंद झाली आहेत. तर पोतरा गावातील शाळा बंद करण्यात आल्या आहेत. जिल्हा परिषदेची शाळा बंद ठेवण्याचा निर्णय पोतरा गावातील गावकऱ्यांनी घेतलाय.

वनविभाग जोपर्यंत बिबट्या जेरबंद करणार नाही तो पर्यंत विद्यार्थ्यांना शाळेत पाठवणार नाही, अशी भूमिका गावकऱ्यांनी घेतलीय. जिल्हा परिषदेची शाळा गावातील जंगलाला लागून असल्याने धोका असल्याने गावकऱ्यांनी शाळा बंदचा निर्णय घेतलाय. कळमनुरी तालुक्यातील पोतरा आणि परिसरातील सात गावांमध्ये बिबट्याच्या हल्ल्यामुळे मोठी दहशत पसरलीय.

सलग दुसऱ्या दिवशी बिबट्याने गावालगतच्या आखाड्यावर हल्ला करत दोन वर्षांच्या वासराचा फडशा पाडला. शिवारात चक्क तीन बिबटे पाहिल्याचा दावा एका शेतकऱ्याने केल्यानं गावात भीतीचे वातावरण आहे. तेलंगवाडी, पोत्रा, सिंदगी शिवारात गावकरी भीतीच्या सावटाखाली जीवन जगत आहेत.

बिबट्याच्या दहशतीने गावकरी धास्तावले आहेत. शेत शिवारातील कामे सोडून शेकडोंच्या संख्येने गावकरी शेकोट्या करून बसले आहेत. कधी आणि कसा बिबट्या गावात येईल आणि हल्ला करेल या भितीने नागरिक धास्तावले आहेत. हिंगोलीच्या कळमनुरी तालुक्यामधील पोत्रा गावात ग्रामस्थ रात्र जागून काढत आहेत. तर पोतरा गावातील लोकांनी मुलांना शाळेत न पाठवण्याचा निर्णय घेतलाय.

कळमनुरी तालुक्यातील पोतरा शिवारामध्ये बिबट्या आढळून आल्यानंतर वन विभागाच्यावतीने त्याला जेरबंद करण्यासाठी हालचाली तीव्र करण्यात आल्यात. शेतकऱ्यांनी दिलेल्या माहितीनुसार ठीकठिकाणी २५ कॅमेरे लावण्यात आलेत. आखाडा बाळापूरपासून जवळच असलेल्या पोतरा शिवारामध्ये मागील दोन दिवसांपूर्वी बिबट्याने शेतशिवारावरील आखाड्यात बांधलेल्या शेळ्या-वासरांवर हल्ला करत त्यांचा फडशा पाडला होता. परिसरातील शेतकरी, शेतमजूर, महिला मजुरांमध्ये दहशतीचे वातावरण पसरलंय.