Abdul Sattar: 'बिबट्या राष्ट्रीय प्राणी', व्याघ्र दिनालाच अब्दुल सत्तार यांचं अजब वक्तव्य; पाहा व्हिडिओ

भारताचा राष्ट्रीय प्राणी कोण? असा प्रश्न विचारताच शाळकरी मुलगाही सहज उत्तर देईल. वाघ... मात्र राज्याच्या कॅबिनेट मंत्र्यांना या प्रश्नाचं उत्तर ठाऊक नाही. विशेष म्हणजे २९ जुलै या आंतरराष्ट्रीय व्याघ्र दिनालाच. शिवसेनेच्या या 'वाघाने' आजच्या दिवशीच चक्क बिबट्याला राष्ट्रीय प्राणी म्हणून घोषित केलंय. सत्तार म्हणाले आहेत की, बिबट्या हा राष्ट्रीय प्राणी असून त्याला सुरक्षित ठेवण्याचे काम वन विभागाचे अधिकारी करत आहेत.

संभाजीनगरात खरंतर गेल्या काही दिवसांपासून बिबट्याची दहशत आहे. शहराच्या मध्य भागातील उल्कानगरीत तसेच सिडको भागातील एका मॉलच्या सीसीटीव्हीमध्ये बिबट्या दिसला होता. 6 पथकं, 100 कर्मचारी, एक गनमॅन दोन आठवड्यापासून बिबट्याचा शोधात आहेत.

मात्र या हुशार बिबट्यानं सगळ्यांनाच हुलकावणी दिली आहे. आता नवनियुक्त पालकमंत्र्यांनी बिबट्याला तीन दिवसात पकडण्याचे आदेश दिलेत. अब्दुल सत्तार म्हणाले आहेत की, लवकरात लवकर बिबट्याला जंगलात सोडण्यात येईल, जेणेकरून तो सुरक्षित राहील.

सत्तार हे त्यांच्या कोणत्या ना कोणत्या राजकीय वक्तव्यामुळे नेहमीच वादात साप़डतात. मात्र यावेळी त्यांनी थेट राष्ट्रीय प्राण्याबाबत अकलेचे तारे तोडल्यानं नव्या वादात सापडले आहेत.