Latur: लातूरमध्ये पुन्हा भूकंपाचे धक्के, रात्री अचानक जमीन हादरली; सगळेच घराबाहेर पडले, नागरिकांमध्ये भीतीचे वातावरण

Summary -

• भूकंपाच्या धक्क्याने लातूर पुन्हा हादरले.

• लातूरमध्ये २.४ रिश्टर स्केल तीव्रतेचे सौम्य भूकंपाचे धक्के बसले.

• सलग दुसऱ्या दिवशी भूकंपाचे धक्के जाणवले त्यामुळे नागरिकांमध्ये भीतीचे वातावरण

• प्रशासनाकडून घाबरू नका पण सतर्क राहा असे आवाहन करण्यात आले.

भूकंपाच्या धक्क्याने लातूर हादरले. लातूरच्या बडूर, उस्तुरी गावात भूकंपाचे सौम्य धक्के बसले आहेत. २.४ रिश्टर स्केलच्या धक्क्याची नोंद झाली आहे. बुधवारी मुरुड आकोला इथे देखील भूकंपाचे धक्के जाणवले आहेत. नागरिकांनी घाबरून घराबाहेर धाव घेतली. नागरिकांनी घाबरून जाऊ नये असे आवाहन प्रशासनाकडून करण्यात आले आहे.

मिळालेल्या माहितीनुसार, लातूरच्या निलंगा तालुक्यातील बडूर आणि उस्तुरी गावात रात्री ९ वाजून ३० मिनिटाला भूंपाचे धक्के जाणवले. २.४ रिश्टर स्केल तीव्रतेच्या भूकंपाची नोंद करण्यात आली आहे. कलबुर्गी, लापूर, नांदेड आणि लातूर या ठिकाणच्या भूकंप मापक यंत्रावर तपासणी करण्यात आली. त्यानंतर २.४ रिश्टर स्केल या सौम्य भूकंपाची नोंद आढळून आली.

तर कालच लातूरच्या मुरुड अकोला गावात देखील २.३ रिश्टर स्केल तीव्रतेचे भूकंपाचे धक्के बसले. दरम्यान सलग दुसऱ्या दिवशी भूकंपाच्या धक्के बसल्याने नागरिकांमध्ये भीतीचे वातावरण आहे. १९९३ साली झालेल्या किल्लारी भूकंपाची पुनरावर्ती होती की काय? अशी भीती नागरिकांमध्ये आहे. मात्र दोन्ही भूकंपाचे धक्के हे सौम्य असल्याने नागरिकांनी घाबरून न जाता सतर्क राहण्याचे आवाहन जिल्हा आपत्ती व्यवस्थापनाच्या वतीने करण्यात आले आहे.

चंद्रपूर जिल्ह्यातील वरोरा तालुक्यातील मार्डा, एकोणा गावात भूकंपाचे सौम्य धक्के जाणवले. याचा केंद्रबिंदू भूकंप अॅपवर दाखवला गेला असून तीव्रता ३.२ रिश्टर स्केल एवढी आहे. त्यामुळे एकच खळबळ उडाली. मात्र कोणत्याही प्रकारचे भूकंपाचे धक्के जाणवले नसल्याचे प्रशासनाकडून सांगण्यात आले आहे. या परिसरात वेकोलीच्या कोळसा खाणी आहेत. त्यात मोठ्या प्रमाणात स्फोट घडवले जातात. याचाच हा धक्का असावा, अशीही शक्यता व्यक्त केली जात आहे.