Latur News : धाडसत्रानंतर परतताना पोलिसांची जीप नाल्यात कोसळली; ४ कर्मचारी जखमी

संदीप भोसले, साम टीव्ही

लातूर : औसा तालुक्यातील उजनी परिसरात कारवाईसाठी पोलिसांची टीम गेली होती. कारवाई केल्यानंतर परतत असताना वळण रस्त्याचा अंदाज न आल्याने पोलिसांच्या गाडीला अपघात झाला. गाडी अनियंत्रित होऊन थेट रस्त्याच्या बाजूला असलेल्या बंधाऱ्यात कोसळली. यात गाडीतील चार पोलीस कर्मचारी जखमी झाले आहेत. त्यांना लागलीच रुग्णालयात उपचारासाठी दाखल करण्यात आले आहे. 

लातूरच्या (Latur News) औसा तालुक्यातील उजनी परिसरातील चिंचोली, टाका मासूर्डी. बिरवली, एकंबी, वाडी, एकंबी तांडा येथे पोलिसांकडून कारवाई सुरु आहे. आचारसंहिता जाहीर झाल्यापासून भादा पोलिसांची पथके सतत धाडसत्र टाकत आहे. अनेक गावात दारू, गुटखा मोठ्या प्रमाणात विक्री सुरू आहे. त्यामुळे भादा पोलिसाचे चार कर्मचाऱ्यांचे पथक रविवारी पहाटे सहा वाजता एकंबी तांडा येथे कारवाई करण्यासाठी गेले होते. याठिकाणी कारवाई केल्यानंतर पथक माघारी फिरले. 

दरम्यान धाड टाकून उजनीमार्गे परत येतं असताना उजनीपासून दोन किमी अंतरावर भादा पोलिसाची जीप पलटी होऊन अपघात (Accident) झाला. त्यात भादा पोलीस स्टेशनचे कर्मचारी आनंद शिंदे, ज्ञानेश्वर जमादार, चंद्रकांत कलमे, व शिसगर असे चार कर्मचारी किरकोळ जखमी झाले आहेत. उजनी येथील शेतकऱ्यांनी जखमी अवस्थेतून गाडी बाहेर काढले असून पुढील उपचरासाठी पाठवण्यात आले आहे.