संदीप भोसले, साम टीव्ही प्रतिनिधी
लातूर : लातूरमधून अपघाताची भीषण घटना समोर आली आहे. लातूरमध्ये वास्तूशांतीचा कार्यक्रम आटोपून निघालेल्या कुटुंबावर काळाने घाला घातला आहे. लातूरच्या उदगीर-अहमदपूर महामार्गावर ट्रक आणि कारच्या भीषण अपघातात एकाच कुटुंबातील चार जणांचा जागीच मृत्यू झाला आहे. या भीषण अपघातानंतर परिसरात खळबळ उडाली आहे.
लातूर जिल्ह्यातील उदगीर अहमदपूर महामार्गावरील एकुरका गावाजवळ ट्रक आणि कारचा भीषण अपघात झाला आहे. या अपघातात कारमधील चार जणांचा जागीच मृत्यू झाला आहे. तर दोघांची प्रकृती चिंताजनक असल्याची माहिती समोर येत आहे. दरम्यान जखमींना उदगीरच्या सामान्य रुग्णालयात दाखल करण्यात आल आहे. तर अधिकचा तपास पोलीस करत आहेत.
मिळालेल्या माहितीनुसार, लातूरच्या दावणगावात भंडे कुटुंब वास्तूशांतींच्या कार्यक्रमासाठी एकुरका रोड या ठिकाणी गेले होते. या भागातील कार्यक्रम आटोपून निघताना एकुर्का ते इस्लामपूरदरम्यान दोन गाड्यांचा अपघात झाल्याची घटना घडली आहे. या अपघातात मंगलाबाई जाधव, प्रणीता बिरादार, प्रतिभा भंडे, अनन्या भंडे यांचा जागीच मृत्यू झाला आहे. तर संजय भंडे, सई आणि आदिती भंडे या हे गंभीर जखमी झाले आहेत. या जखमींना उदगीरच्या उपजिल्हा रुग्णालयात दाखल करण्यात आले आहे.
दरम्यान, दिवाळी सणादरम्यान एकाच कुटुंबातील चौघांचा मृत्यू झाल्याने दावणगावावर शोककळा पसरली आहे. या अपघाताची माहिती मिळताच वाढवणा पोलीस घटनास्थळी पोहोचले. या अपघातातील जखमींना उपचारासाठी उदगीरला पाठवण्यात आले. या अपघात प्रकरणी गुन्हा दाखल करण्याची प्रक्रिया वाढवणा पोलीस ठाण्यात सुरु असल्याची माहिती पोलीस सूत्रांनी दिली आहे.
सकाळ+चे सदस्य व्हा
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.